Kumba ka 6th Meghalaya Games 2025 kala sdang naduh ka 15 tarik mynta u bnai, ha kaba shibun ki jingpyni tynnad ka jingpynphuh pynphieng la leh hapoh ka nongbah Jowai. Kadei ka sien ba nyngkong ba kane ka lympung ialeh kai sport kaba heh duh hapoh ka jylla, la pynlong hapoh ka West Jaintia Hills District.
Kumta na ka liang ka Synjuk Waheh Shnong Jowai, ka khot bad wer ia baroh ki nongshong shnong ki lok ki jor ban iasnoh kti lang bad khamtam ban don ia ka akor ka burom ha baroh ki liang. Ka la kyntu ruh ia baroh ki nongshong shnong ban pdiang ia ki nongwanialehkai ne ki nongiashim bynta kumjuh ki nongwan peitkai da kata ka akor ka burom, kaba ki nongwan kin sahkhana pateng ia ka jinglehbha ka District ka jong ngi ia ki. Na ka liang ka Synjuk ka la kyntu ruh ia baroh ba ymdei ban pynjot pynpra ne pynsniew da kaba biah ia kiei kiba ka sorkar ka la buh sharud surok ne ha kiwei de ki bynta naduh ki dur ki dar, ki Poster ki Flex bad kiwei de ki jingpynitynnad ha ka jingiadei bad kane ka Meghalaya Games.
Ka Synjuk Waheh Chnong Jowai, ka la kyntu ruh ba ymdei ban pynshongshit ia ki nongialehkai kiba ia shimbynta ia ki jingialehkai bapher bapher da ki kyntien khlem akor. Hynrei ki dei ban ai bor ai mynsiem ia ki da ki kyntien kiba don akor bad burom.
Shuh shuh ka la kyntu bad khot ia baroh ban pynlong ia kane ka jingialehkai 6th Meghalaya Games 2025 hapoh ka Ri Jaintia jong ngi, kaba sngewtynnad ki nongwan bad nongialehkai.