Ki Pulit jong ka Ri-Bhoi District kila kyntu ia kiba haiing ne kiba don jingiadei ban leit peit bad iarap ia uwei u rangbah u ba kila leit buh ha NEIGRIHMS hadien bala lap narud surokbah.
Ki Pulit ki iathuh ba kila ioh jingtip ba ha ka 18/11/2025 ha ka por kumba 2:20 AM la don uwei u rangbah uba ha ka rta kaba 35-40 snem ei ei uba la thiah lyngkthar khlem tip briew shuh, harud jong u surokbah ha shnong Mawpun, Ri-Bhoi District.
Ia une u rangbah la leit pynkit mar mar ban ioh jingsumar sha Bhoirymbong CHC, hynrei la phah kynriah ia u sha Civil Hospital Nongpoh bad nangne ruh la hap ban pynkynriah biang ia u sha NEIGRIHMS, Mawdiangdiang ban ioh jingsumar kaba biang, mynta ia u la pynthiah hapoh ICU haduh ba thoh ia ka khubor.
Kumta na ka liang ki Pulit ka Ri-Bhoi ki kyntu ia kino kino kiba don jingtip ia une u rangbah ba kin sngewbha ban phone hapoh Police Control Room (PCR) Nongpoh, Mobile No:9856084514.
