U Additional Deputy Commissioner ka West Jaintia Hills District ba bat kum Project Director ka DRDA u Shri. P.K. Boro haba kren ha ka prokram jingiapylliew jingmut hapdeng ki briew sorkar bad ki nongrep ula kyntup jur ia ki nongrep ba kin long ki ba pyndonkam hok ia kano kano ka jingiarap kaba kila ioh na ka sorkar khnang ba kin lah ban nang pynkiew shuh shuh ia ka kam rep kam riang jong ki.
Ia kane u Boro ula kren ha ka jingialang kaba la long ha District Library, Mynthong Jowai mynta ka sngi, ha ka jingiadon lang ki sahep sorkar ba kynthup ia u Dr. D.I Kjam, District Veterinary & Animal Husbandry Officer, u C.Najiar, District Horticulture Officer, kong S.E Kynjing, u B. Niang, officers ka Horticulture and Agriculture Department, Jowai bad ruh ki kynhun trei mon sngewbha(NGOs) bad la don lang ruh u ma Chanky Lyngdoh, Managing Director Chankylliang Development Society.
Ha kane ka prokram la wan ban iashim bynta da ki nongpynmih mar rep bapher bapher na ki lai tylli ki C&RD Block kiba kynthup ia ka Amlarem, ka Thadlaskein bad ka Laskein Block.
Shuh shuh haba kren u Boro ula kyntu ruh ia ki NGO kum ka SURe bad ka Chankylliang Development Society ba kin iarap ban ai jinghikai pyntbit shuh shuh ia ki nongrep ba kin nangleh ban pynbha bad ban pynbun shuh shuh ia ka jingpynih ia ki mar rep jong ki.
La ioh ka jingbatai lyngba ka jingpynidur da u Starwell Paduna, Assitant Manager, Amlarem Block halor ka jingthmu jong ka FOCUS (Farmer Collectivisation for Up-scaling Production and Marketing System). Ula iathuh ruh ba lyngba kane ka prokram ka sorkar kan pynioh jingiarap Rs.5000/- tyngka sha kito ki nongrep kiba la dep ban register khnang ba kin lah ban pynheh shuh shuh ia ka kam rep kam riang jong ki ban long ka jingpynkiew ia ka ioh ka kot jong ki.
U la pyntip ba ha Amlarem C&RD Block ki don 48 tylli ki Producer Groups, ha Laskein C & RD 52 tylli bad ha Thadlaskein pat ki don 68 tylli ki Producer Groups.
Kiwei de kiba ai jingkren ki kynthup ia u Dr. D.I Kjam, District Veterinary Animal & Husbandry Officer, Chanky Lyngdoh, Managing Director, Chankyliang, Development Society bad nongmihkhmat na ka SURE, nalor ki nongrep ar – ar ngut na kawei ka Producer Group.
Ha kane ka jingialang la ai ia ki cheque sha kito kiba ki Producer Groups kiba la shah jied ban ioh. Ia ka jingialang la pyniaid da u Sywell Lyngdoh, District Project Manager, District Basin Development Unit, West Jaintia Hills District. Ia ki kyntien pdiang la ai da ka kong Muhor Ksiar Syngkon, Assistant Manager, District Project Manager bad ia ki kyntien ai khublei la ai da ka kong Erniki K. Shylla, Assistant Manager, Laskein Block.
