U National President jong ka National People’s Party (NPP) u Conrad K. Sangma hynne ka sngi haba ai jingkren ha ka jingialang ba la pynlong da ka National People’s Youth Front (NPYF) ha Soso Tham Auditorium, Shillong ula ong ba ka long kaba donkam ia ki khun samla ban mih shakhmat ban shakri ia ka jylla bad ban noh synniang ruh sha ka jingtei ia ka ri hi baroh kawei.
U Conrad u ong ba ka jingai bynta ia ki samla ha ka imlang ka sahlang bad ruh ha ki kam saiñ hima sima kan long ka thong bad ka jingmyntoi kaba khraw na ka bynta ka jingshakri ia ka imlang ka sahlang.
Ula pynkynmaw ruh ia ki kyntien jong u (L) Purno Agitok Sangma uba ju long u khlieh nongialam jong ka NPP kaba ong “Uwei pa kawei ki dei ban trei da ka jingthmu ban don ia ka thong, ngi dei ban don ia ka jingiohi jngai bad trei na ka bynta ban ioh ia kata ka thong, kum ki samla donkam ban trei shitom ban ioh ia ka thong ha ka jingim”.
Khadduh eh u Conrad ula kyntu jur ia ki samla ba ki dei ban trei da ka jingiaishah bad jingthmu ban shakri ym tang ia ka party hynrei ia ka imlang ka sahlang bad ban noh synniang ruh sha ka jingtei ia ka ri hi baroh kawei.