U Deputy Commissioner ka West Jaiñtia Hills District u Abhinav Kumar Singh, IAS mynta ka sngi ula plie paidbah ïa ka District Level Nasha Mukt Bharat Abhiyaan campaign, ha ka jingïalang bala pynlong ha training hall ka DC office, Jowai.
Ïa kane ka prokram la ïasnohkti lang naduh ka ophis u Deputy Commissioner, ka District Social Welfare Officer, Jowai ha ryngkat ki kynhun treimon sngewbha NGOs kiba dei ki Member Selected ba ju kyrshan da ka Ministry of Social Justice and Empowerment jong ka sorkar India, halor ka phang “Substance Abuse -Prevention Treatment and Rehabilitation”.
Na ka liang u Abhinav K. Singh haba ai jingkren ula ong ka por kala dawa bha ban ialehpyrshah ïa ki jingdih pynbuaid hapoh ki shnong ki thaw. Kumta ka donkam ïa ki shnong ki thaw ban ïatreilang bad ka sorkar. U kyrmen lyngba kane ka prokram bad da ka jingïatreilang da baroh ki tnad sorkar hapoh ka West Jaiñtia Hills District yn sa lah ban pynlong ia ka District kaba lait na ki jingdih pynbuaid sha ka Ri India kaba lait na ki jingdih pynbuaid.
U la ong ruh ba ha kane ka prokram la pynlong ïa ki jingïakop bapher bapher kum ka jingdro dur, marathon bad ki jingïalehkai surok (street play). Ula pyntip ruh kin don ki prokram ai jinghikai ha kylleng ka District kum ka lad ban pynsngewthuh khambniah sha ki paid nongshong shnong.
U Additional Superintendent of Police u Ishan Gupta, IPS, ula pynsngew halor ka jingdonkam ban tehlakam ïa ka rukom pyndonkam ïa u Drug, ula ong ruh ka jingkynrei kum kine ki jait pyndonkam ba sniew ka ktah ym tang ïa ka Ri hynrei wat hapoh ki shnong jong ka District naduh ki jaka sor haduh ki jaka nongkyndong. Kumta ka long kaba donkam eh ban ïakhun katba lah ban pynduh jait ïa u Drug da ka jingïatreilang.
Ïa ki prokram bapher bapher yn pynïaid ha ryngkat ka jingïatreilang ka Social Welfare department, Police Departments, District Medical & Health Officer (DM&HO), District Legal Service Authority (DLSA), Sports Departments, ka NGO groups Breakthrough, Khliehtyrshi, ka Society for Urban and Rural Empowerment (SURE) bad ka Mihmyntdu Communities Social Welfare Association (MCSWA) Jowai.
Ha ka jingïalang bala pynlong mynta ka sngi la ïadonlang da u Brand Ambassador ka Nasha Mukt Campaign u Chibait Langstang, ka Dr. JN Chullai Director MCSWA, u ma C.S Laloo, Rtd. Controller Legal Metrology, Jowai bad ka kong Y. Najiar, District Social Welfare Officer, Jowai.
