Ha ryngkat baroh kawei ka jylla, ïa ka sngi Meghalaya ba 53 la rakhe lang da ki bor pynïaid District jong ka East Jaiñtia Hills District ha ka jingïalang kaba la long ha Conference Room jong ka ophis jong u Deputy Commissioner, East Jaiñtia Hills District, Khliehriat ha kaba la wan ban ïashim bynta lang da u Deputy Commissioner, East Jaiñtia Hills District, U Shri Shivansh Awasthi, u SP, East Jaintia Jaiñtia Hills District, u Shri Giri Prasad, ka Additional Deputy Commissioner ka East Jaiñtia Hills District, kong J.U Kharpuri, u Additional Deputy Commissioner ka East Jaiñtia Hills District bah G. Warjri, ka kong F. Wann, Assistant Commissioner EJH bad kiwei pat ki nongtrei sorkar, ki khlieh nongpyniaid shnong bad ki samla pule.
Ha ka jingkren jong u, u Deputy Commissioner jong ka East Jaintia u la pynpaw ia ka jingkordor jong kane ka sngi kum ka jingpynkynmaw ia uwei pa uwei u nongshim bynta ha ka jylla halor ka jingnoh synniang kaba khraw tam kaba la leh da ki kpa tymmen kiba la trei shitom bha na ka bynta ban seng ia ka jylla Meghalaya kum ka jylla bapura. U la ong ruh ba khnang ban pynlong ia ka jylla Meghalaya kum ka jylla kaba la kiew bha, uwei pa uwei u nongshong shnong u donkam ban bishar bniah ia lade ia kaei kaba la leh ha kine ki 53 snem ba la dep, ha kaba u la pynshlur ia ki heh sorkar kiba la don lang ha katei ka sngi ban bteng ia ka jingaiti kaba khlem artatien ha la ki jong ki jong ki kyrdan na ka bynta ka jingmyntoi jong ka jingroi jingpar jong ka Meghalaya baroh kawei.
U Shivansh Awasthi, haba u ithuh ia ki sap jong ka jylla khamtam bad ka thaiñ hi baroh kawei, u la kyntu ia ki nongshong shnong jong ka Distrik ban shim kabu ia ka rukom kyrshan ba la pynioh da ka sorkar da ka jingthmu ban kyntiew ia ka jingim jong ki wat kumba u la pynpaw halor ki katto katne ki ki jingthmu ba la shim da ka sorkar jylla na ka bynta ban kyntiew ia ka jylla ha kaba iadei bad ka pule puthi, ka koit ka khiah, bad kiwei kiwei.
U Superintendent of Police ka East Jaintia Hills District, u Giri Prasad ha ka jingkren jong u ha kane ka prokram u la iaroh ia ka jinglong kyrpang jong ka jylla Meghalaya katba u la buh ruh ia ka jingiaroh ia ka riti dustur kaba riewspah jong ka jylla ka jingburom kaba khraw ha ka iing ka sem bad ka imlang sahlang.
Ha kajuh ka por, ka Additional Deputy Commissioner ka East Jaiñtia Hills District ka kong J.U Kharpuri ha ka jingkren jong ka, ka la kren batai bha halor ka jingdonkam jong kane ka sngi ba kyrpang ka jylla. Ka la ban jur halor ka jingdonkam ban pynneh pynsah ïa ka kolshor ba kyrpang jong ka Meghalaya kaba long kum ka dak jong ka jinglong kyrpang jong ka.
Ki la don ruh ki jingpynbyrngia ha kane ka sngi kum ki jingshad tynrai bad ki jingrwai tynrai ba la pyni da ki nongshong shnong jong ka East Jaintia Hills District.
