U ma Ngalong Sukhlaiñ u dei u briew uba don ki jingduna ha ki dkhot met jong u, ha kaba ki kjat jong u kim lah ban kyrshan ia ka met ban ïeng ne ban ïaid.
Hynrei la katta u long pat u briew uba trei shitom ban pyndap ialade bad iala ka ïing ka sem jong u.
U Ngalong u don ia ka sap ban shna ia ki tiar electronic kum ia ki Mobile phone, ki Speaker, ki tiar lait kum ki ketli shet sha, ki khiew shet ja bad kiwei kiwei, nalor kata u ong ba u nang ruh wat ban maramot wat ia ki computer bad Laptop.
Mynshwa u Ngalong u trei bylla ha kawei ka dukan kaba don ha Iawthymme, Ladthalaboh. Hynrei na ki daw ba yn sa hap ban kynriah noh ia katei ka dukan shawei pat, kumta ula duh jingkyrmen halade bad u hap ban wat ki lad ki lynti shawei pat.
Hynrei donbok ba u don ka jingithuh ithaw bad u Dr. H.H. Mohrmen uba dei u General Secretry jong ka SURE ka kynhun treimon sngewbha ha ri lum Jaiñtia kumta ula pan jingtrei noh na utei u rangbah.
Khlem da pynslem ka SURE kala ailad noh ia u Nanglong ban shong die dukan ha ka Dukan jong ki, kaba don ha Chutwakhu, ha khrum jong ka skul HK Singh bad ki la ai ruh ia u da ka siew kaba malu mala.
Hynrei ka SURE kala ailad pat ia u ban trei ia ka kam kaba u ju trei kata ban maramot Mobile bad kila ai ia u kawei ka karma kaba rit ba un trei, klem da hap ban siew dor.
Kumta na ka liang jong u Ngalong ula buh ka jingkyntu bad khot wer ia baroh ki paralok parajor jong u kiba ju mlien ban phah shna Mobile ha u ba kin wan sha kane ka dukan kaba u trei mynta.
Ha ka juh ka por u kyrpad ruh ia kiwei pat ki paralok kiba don mynsiem ban ai ka jingkyrshan ia u, khnang ba un lah ban thied ia ki tiar kiba un ioh ban pyndonkam ha ka jingtrei jong u.
