“Thrang ban ïohi ïa ki jingkylla hapoh ka nongbah Jowai”
Uwei na ki riew rangbah ka sor Jowai u ma O.R. Challam ula ong kum u nongshong shnong u kwah ban pynsngew sha ki paidbah ha kaba ïadei bad ka jingjied ïa ki nongmihkhmat ha kane ka Election MLA-2023, da kaba u buh ka jingkyntu sha ki paidbah nongshnong shnong ba kim dei ban shah pynbeit ha ki jingai sngewbha ba ïoh ei na ki kyrtong.
Shuh shuh ula ong ka jingïaid lynti jong ka sorkar hapoh ka sor Jowai la sakhi mynta ba ka jingpyntrei ban siang rong ïa u surok kala ïaid shakhmat mynta. Hynrei kum u nongshong shnong u ma Challam haba la kylli bniah naei kane ka pisa ka poi, la lap ba ka wan lyngba ka skim jong ka World Bank.
Kum u nongshong shnong uba don ka jingkitkhlieh ula pynsngew balei ba ïa ka skim Smart Town kaba wan lyngba ka Urban Affairs haduh mynta ym pat shem la pyntreikam ïa kaba la dep ban khot tender, hynrei la ïohi pynban tang katto katte ki signboard bad ki jingairong airup.
Ula khot ïa ki paidbah nongshong shnong ba kin ïeng hala ka jong ka hok hashwa ban kin jied ïa ki nongmihkhmat, da kaba ym bit ban pdiang ïa ka pisa kaba wan thong sha ki ïing ki sem namar lada ki paidbah ki bakla ban jied ïa ki nongmihkhmat kan long ka jingduh nong kaba khraw, u la pynsngew ïa ki jingeh ba ki nongshong shnong kila mad ha kane ka samoi 2018-2022.
Da kaba u ai nuksa katkum ka Election Commission kala pynbna ïa ki kyntien kiba ong “em ïa ka pisa, haoid ïa ka vote”, namar lada ki ai 15 hajar ka poi tang 8 tyngka shi sngi, 10 hajar ka ïa rynkat 5 tyngka shi sngi, 5 hajar ka long 2 tyngka shi sngi, 2 hajar pat shi tyngka shi sngi.
Ula ai ruh ka jingïaroh ïa ki nongïalam jong ki Dorbar Shnong bapher bapher kiba la pyntrei kam ïa ki kyndon ïalap Election khnang ba ki seng saiñ hima sima kim ym ïoh lad ban leh bor, ula ong ban jied ïa ki nongmihkhmat ha kane ka kynti dei ban jied da kiba don ka thong ban wanrah ïa ka jingkylla, ka khuid ka suba bad ka lawei jong ka jaitbynriew baroh kawei.
“Haba jied ïa u nongmihkhmat dei ban don ka jingthrang ban ïoh ïa ka jingkylla” ong u ma Challam. U kyrmen ba ka sorkar ban wan ha kane ka kynti ka dei ban peit ïa ka lawei jong ki khun samla, ki longkmie, ula pynsngew wat ïa ki kam mynta la khot beit Contractual hynrei ïa kito ki Sanction Post kiba la don lypa shano pat ki jah?
Kum ki kyrtong ki ban shah jied ki dei ruh ban trei hok ban pynbha ïa ka rukom tungkam thungjam State Reservation Policy, ka jingpyntreikam noh ïa ka ILP bad kano kano ka sorkar ban wan kam dei ban pynkynriah ïa ki ophis napoh ka Jowai hynrei ka dei ban wat ki lad ki lynti kumno ban thaw da kiba thymmai sha kiwei pat ki jaka. U ong ki dei ban pyndonkam hok ïa ka MLA skim naka bynta ka snem 2023-2028 ïa kaba la mang sha ki bad da kaba pyni ïa ka Utilization Certificate manla ka snem bad ym dei ban sam skim hashwa ka Election.
Haba kren shaphang ka jinglong jingman jong ka sor Jowai u ma O.R Challam ula ong ba ka sor Jowai ka donkam ban don noh ïa ka jaka bret ñiut kaba paka, kaba ar ka long ban ïoh ïa ka umbam umdih kaba khuid ba suba namar ha ka por slap ki longïing kila ïoh pynban da ka umbam kaba jaboh, ïa ki tnad treikam jong ka sorkar baroh hapoh ka sor Jowai dei ban pynbha noh ïa ki.
Ula ong ruh ba u thied snam jong ka Jaiñtia Hills ka dei ka Iawmusiang kaba la sah teng da ki bun snem mynta khlem pat pyndep, ula buh jingkylli balei ïa kane ka ïew la ieh sah ïa ka kumne wat hadien ki jingkular ba bun na ki nongmihkhmat, kum u nongmihkhmat u ban shah jied ha kane ka kynti u dei ban peit ïa kine ki jingeh.
Hadien ka jingjurip ïa ki kot ki sla jong ki kyrtong kila ïoh ka lad ban ïakhun ïa kane ka Election ula ai ka jingkitbok kitbok kitrwiang ïa baroh.