Sam kor lur u MLA ka Jowai sha ki 12 tylli ki kynhun nongrep
Ki nongrep ki dei ban shim ba ka kam rep ka dei kawei na ki bynta kaba aikam ai jam ïalade bad ïa kiwei kumjuh, ha kaba u la buh ruh ka jingkyntu ïa ki nongrep ba ki dei ban pynmlien lem ïa la ki jong ki khun ki kti jong ki ha ka kam rep kam riang.
Ia kane u ma Wailadmiki Shylla MLA ka 2-Jowai Constituency ula kren hynnin ka sngi ha ka jingïalang sam tiar (Agri-Tools and farm machineries) kynthup ïa ki kor lur sha ki 12 tylli ki Integrated Village Co-operative Societies (IVCSs) jong ka Thadlaskeiñ bad Amlarem Block ha ka jingïalang kaba la pynlong ha Tyrshi Inn, Khliehtyrshi.
Ïa kane ka program la pynïaid da ka District Project Management Unit, jong ka West Jaiñtia Hills District.
U la ong ruh ba ka long kaba donkam bha ban don ka jingïatreilang hapdeng ki tnat sorkar, ka IVCS bad ki nongrep hapoh kine ki Block khnang ba yn lah ban kyntiew shaphrang ïa ka ïoh ka kot jong ki nongrep. U ma Shylla ula ai jingmut ïa ka kynhun jong ka DPMU ba kin pynlong ïa kum kine ki prokram ha ki jaka paidbah kum ha ki ïew ki hat na ka bynta ban khring ïa shibun ki nongrep.
U la pyntip ruh ba na ka liang jong u, ula don ka jingthmu ban don ka jingïakynduh lang hapdeng u Deputy Chief Minister ma S. Dhar, u DC bad ki tnat ba dei peit ïa ka rep ka riang ryngkat ki nongrep na ka bynta ban ïasyllok ïa ka jingdonkam ban pynbha shuh shuh ïa ka rep ka riang.
Kiwei de kiba la ai jingkren ha kane ka sngi ki long u Deputy Commissioner ka West Jaiñtia Hills District u bah B.S. Sohliya, IAS, u ma A. Suting Deputy Project Director, M-LAMP, u ma M. Lamare, Assistant District Agriculture, kong E.Buam, Deputy Manager, DPMU bad u bah S. Rani, District Horticulture Officer. Kham hashwa la ïoh ïa ka jingkren pdiang da u bah S.Lyngdoh, DPM, DPMU bad ïa ka jingïalang la pynïaid da u bah Starwell Paduna, Deputy Manager, DPMU bad ka kong M. Syngkon, Assistant Manager, DPMU, kala ai ïa ki kyntien ai khublei.
