Ka ophis jong u Senior Dairy Officer, West Jaintia Hills mynta ka sngi ka la rakhe ia ka prokram National Milk Day ha phyllaw ophis trei kam ha Mooralong, Jowai ha kaba u MLA ka thain u ma Wailadmiki Shylla u long u konsan.
Haba kren ha kane ka prokram u ma Wailad ula ban jur halor ka jingdonkam ban dih ia ka dud namar ba ka long ka tynrai jong ki jingbam ba teimet. U la kyntu ia ki nongri mrad ba kin ri kham bun ki Masi khnang ba yn lah ban pynmih shibun ka dud. U la ong ba ki nongri ki dei ban pynleit jingmut ban pynneh ia ka jingpynbiang ia ka dud kaba bha na ka bynta ki nongshong shnong.
U ma Wailad ula pyntip ba ka sorkar jylla mynta ka la sdang ia ka ‘Milk Mission’ bad lyngba kane ka Mission yn sa pynioh ram sha ki nongri jingri bad ula kyntu ia ki ban shim ia kane ka kabu bad ban pyndonkam hok ia ka.
Kiwei de kiba kren ha kane ka jingialang ki kynthup ia u P.K. Boro ADC, u la kyntu ia ki nongri jingri ban shimkhia ia ka kam bad ban pynmih shibun ka dud na ka bynta ban kyntiew ia ka ioh ka kot hapoh ka ri.
U Dr. I. Kjam District Animal Husbandry & Veterinary, Jowai uba la pynkynmaw ba kane ka dei ruh ka sngi kynmaw ia ka sngi kha jong u Dr. Varghese Kurien uba dei u ‘Father of white revolution’ bad ka dei artad ka jingdap 100 snem ka sngi kha jong u.
U Shri. ACH Roy ula batai lyngkot halor ka phang pdeng jong kane ka jingrakhe ia ka National Milk Day.
Ha kane ka sngi la sam ia ki Syrnod ai mynsiem sha ki nongri jingri ba kynthup ia u Dabana Challam, Lumkyndong (Primary Milk Producer Co-operative Societies) bad ia u Duhniaw Wanmi Lyngdoh Kyrwen PMPCS kiba la pynioh dud ia ka Jowai Dairy Plant. Nalor kiwei de ki riewshimet bad ki kynhup kiba pynbiang ia ki jingdonkam dud hapoh ka nongbah Jowai wat hapdeng ka khlam COVID-19. La sam Syrnod ruh sha ki khynnah skul kiba iashim bynta ha ka jingiakop Essay bad Drawing.
Kham ha shwa la ioh ka jingkren pdiang na u B. Dkhar, Senior Dairy Officer, bad ka jingkren aikhublei sha baroh da u E.C. Pyngrope Dairy Officer (Extension) RDEC, Jowai Dairy Plant.
