U MLA ka East Jaintia Hills, u ba long ruh u Myntri ka sorkar jylla, u Bah Kyrmen Shylla u la ong ba ka Sorkar Jylla kala dei ban bishar halor ka jingdonkam ban wanrah ia ka jingpynkylla ia ki kyndon ban sdang tih dewiong katkum ka juk stad saian ba mynta.
Haba kren ha ki lad pathai khubor, u Bah Kyrmen u la pynpaw ia ka jingsngewkmen halor ka jingkyrshan ki paidbah ia ka ‘Public Hearing’ ban sdang ia ka jingtih dewiong katkum ka juk stad saian ha kane ka jylla Meghalaya.
“Ha ka ‘Public Hearing’ ki paidbah ki la pynpaw ia ka jingshaniah ha ka Sorkar Jylla ba kan sdang noh ia ka jingtih dewiong katkum ka juk stad saian hynrei tang kawei ka jingsngewkhia kaba ki pynpaw ba, kumno ka jingtih dewiong ka dei ban sdang” ong u Bah Shylla.
U la bynrap ruh da kaba ong ba don ka jingshaniah haka Sorkar Jylla ne ka tnat ba dei peit ba kan kohnguh ia ka jingkyrpad jong ki paidbah ban pynkylla khyndiat lada donkam ia ki kyndon ban sdang tih dewiong.
U Bah Shylla u la ong ba ki paidbah ki kwah ban ïohi noh kumno ka jingtih dewiong kan sdang noh bad kumno kan long, da ka ba pynpaw ruh ka jingkhublei ïa u Myntri Rangbah ka Jylla uba la leh ïa kaba bha tam bad uba la wanrah ïa ka hok sha ki paidbah.
U Bah Kyrmen u la ong ba haba iadei bad ki aiñ jong ka Sorkar Pdeng kiba donkam ban bud, bunsien ka shim por bad haduh mynta tang 4 ngut ki la pyndep ia ki rukom treikam ba donkam bad ka Sorkar Pdeng ban sdang ia ka jingtih dewiong, da kaba kdew ruh ba ki don bun ki nongaplai laisen ban tih dewiong hynrei haduh mynta tang 4 ngut ki la pyndep ia ka rukom namar ki dei kiba nyngkong eh ban aplai.