Satang shi bnai dang sah ban rakhe ïa ka International Day of Yoga (IDY) kaba 11, u Myntri Rangbahduh Narendra Modi, ha ka bynta ba 122 jong ka Mann Ki Baat, u la kyrpad ia ki briew kylleng ka pyrthei ban pdiang ïa ka yoga na ka bynta ka bha ka miat ba pura bad ka rukom im ba seisoh.
U Myntri Rangbahduh u la ïohi ba ka jingshitrhem ïa ka sngi Yoga ka dang ïai bteng ban kiew ha ri India bad ha ka pyrthei. “Naduh ba la sdang ia ka ‘Sngi Yoga’ ha ka 21 tarik Jylliew 2015, ka jingkhring sha ka ka nang iai kiew. Ha kane ka kynti ruh, ka jingkmen bad jingshitrhem hapdeng ki briew ha kylleng ka pyrthei ha kaba ïadei bad ka Sngi Yoga ka paw bha,” u la pynpaw. U Myntri Rangbahduh Narendra Modi u la kyntu shuh shuh ïa ki briew ba kin pyrkhat thymmai ban rakhe ïa kane ka sngi. Naduh ba la sdang ïa ki jingiasnoh kti na ka bynta ka Yoga haduh ka jingleh yoga ha ki jaka ba pawnam, ki briew ki pynkylla ïa ka IDY sha ka jingïakhih kaba thymmai bad kaba kynthup lang ïa baroh.
Ha ka jingai jingkren jong u, u Myntri Rangbahduh, u la iaroh ia ki sienjam jong ka Andhra Pradesh, ha kaba la sdang ia ka YogAndhra Abhiyan da ka jingthmu ban kyntiew ia ka kolshor yoga kaba khlain ha ka jylla. Ka campaign ka angnud ban tei ïa ka thup jong ki 10 lak ngut ki briew ba leh yoga man ka por, kaba ai nuksa kumno ki jylla ki lah ban ïalam na khmat ha ka jingkylla ha ka koit ka khiah. U la ïasam ruh ïa ka jingkmen jong u ban ïadon bynta lang ha ka jingrakhe IDY mynta u snem ha Visakhapatnam, da kaba ban jur ïa ka jingdonkam jong ka yoga ha ka roi ka par jong ki briew shimet bad jong ka ri.
Haba ai khublei ïa ka jingkiew ka jingïashim bynta jong ki kompeni ha ka yoga, u Myntri Rangbahduh u la ong ba, “Ki kompeni jong ngi kim sahdien ha kane. Don ki jaka treikam kiba la buh kyrpang ïa ka jaka ban leh yoga ha ki ophis jong ki. Don ki start-up kiba la buh ïa ki ‘por leh yoga ha jaka trei’.” Kane, u la ong, ka dei ka dak kaba bha kumno ki riew shimet ki noh synniang sha ka jingïakhih na ka bynta ka koit ka khiah jong ka ri.
Ban kynmaw burom ia ki shiphew snem jong ka jingrakhe ia ka sngi Yoga bad ban rakhe ia ka bynta kaba 11 jong ka IDY, ka Tnad Ayush ka la pynkhreh 10 tylli ki prokram ba kyrpang. Kine ki sienjam ki thmu ban pyniar ia ka jingpoi bad jingiadei jong ka yoga ha ki jaka bapher bapher jong ka imlang sahlang bad ka kam.
Napdeng kine, ka Yoga Sangam ka la dep ban sakhi palat 6,000 tylli ki kynhun kiba la pynrung kyrteng ban pynlong ïa ki prokram, kaba pynlong ïa ka kum kawei na ki jingïalang ba heh tam na ka bynta ka koit ka khiah ba la pynlong da ka imlang sahlang ha ka histori jong ka ri. Ka Yoga Unplugged kaba pynleit jingmut ha ki samla ka nang kiew stet bha, ha kaba ki jaka treikam kiba pawnam ki wan shakhmat ban pynshlur ïa ka pateng ban wan jong ki nong leh yoga. Katba ka Samyoga—ka sienjam kaba thymmai—ka ialeh ban pyniasoh ia ka yoga ha ki rukom ai jingsumar ba kongsan ba kynthup ia ka Ayurveda, ka Homoeopathy, ka Unani, ka Siddha, ka Naturopathy, bad ka Sowa Rigpa.
Kumba la ong u Narendra Modi, “Ka Yoga kan pynkylla ïa ka rukom im jong phi.” La kyntu ia ki nongshong shnong, ki kompeni, ki jaka treikam, bad ki samla ban rakhe ia ka IDY 2025 ha ki rukom kiba don jingmut bad kiba thymmai, ban pynthikna ba ka yoga kan long ka bynta kaba kongsan jong ka jingim ba man ka sngi.
Ka Tnad Ayush ka khot sngewbha ia baroh ban long shi bynta jong kane ka jingrakhe kaba pynkylla dur. Katba ngi dang jan ia ka 21 tarik u Jylliew, ka khubor ka long kaba shai: Ka Yoga kam dei tang ka jingleh—ka dei ka jingkhih na ka bynta ka koit ka khiah jong ka ri, ka jingsuk mynsiem, bad ka bha ka miat ha ka pyrthei.