U Superintendent of Police West Jaintia Hills District u ma C. Syrti, IPS, u la pyntip ba ha kine ki khyndiat sngi ba la dep, ki Pulit jong ka nongbah Jowai kila ïoh pdiang shibun ki jingujor na ki nongshong shnong jong ka sor Jowai ha kaba ïadei bad ka jingshah pyndonkam bakla (Hack) jong ki WhatsApp account jong kia, kaba la wanrah ïa ka jingeh kaba khraw hapdeng ki paidbah nongshong shnong.
Naduh ka 18 tarik Rymphang, 2025, bun ngut ki briew ki la pyntip ba ki WhatsApp jong ki ki la shah pyndonkam bakla ha ki briew bym lah ban tip. Hadien katei ka jingshah hack, ki nongleh kam sniew ki la ju phah khubor sha ki contact jong ki nongpyndonkam kiba shah ktah, da kaba dawa pisa, bad pyntieng pynsmiej ia kiwei.
Na ka liang jong ki Pulit mynta ki dang tohkit ia kine ki jingjia. Kum ka jingpynrem ia kane ka jinglong kaba shyrkhei, la kyntu ruh ia ki paidbah ba kin long kiba husiar bad bud ia ki katto katne ki lad jingiada ban iada ia ki jingtip ba kyrpang jong ki bad ban lait na ka jingshah pynngop ha ki jingleh thok kiba kum kine.
La kyntu ia ki paidbah ba kin: Kiar na kaba jubab ia ki khubor bym tip khlem da pynshisha shwa. Wat Klik ia ki Link kiba i suba sniew: ba ioh lyngba ka WhatsApp, khamtam kito kiba wan na ki briew ki bym tip. Kine ki lah ban ialam sha ki phishing website lane ki malware. Wat ju Sam ia ki OTP ne ki jingtip kiba kongsan: Kiar na kaba sam ia ki Password ba pyndonkam tang shisien (OTP) ne kiwei kiwei ki jingtip kiba kongsan lymda phi thikna ia ka jingshisha jong ka jingkyrpad. Pynthikna beit ia ka tynrai shwa ban iasam ia kum kine ki jingtip. Pynlong ia ka jingpynshisha kaba ar sien: Pynlong ia ka jingpynshisha kaba ar sien (2FA) jong ka WhatsApp ban iada ia ki account. Lada suba ba la shah tuh ka WhatsApp dei ban log out noh mardor na kiba don jingiadei lyngba ka WhatsApp.
Nalor kata dei ban pyntip ia ka jingjia sha ki pulit jong ka thaiñ ban tohkit bniah. Lah ruh ban ujor online haka www.cybercrime.gov.in .
Na ka bynta ka jingshahleh thok ha ka liang ka pisa tyngka kane ne kano kano ka rukom, dei ban phone mardor ha u nombar 1930 na ka bynta ki jingiarap kiba donkam.
Ka tnad Pulit ka shimkhia ban pynthikna ia ka jingshongsuk bad jingshngaiñ jong ki paidbah bad ki dang trei shitom ban tohkit ia kine ki jingjia. Ki Pulit kila kyntu ia baroh ki nongpyndonkam WhatsApp ba kin long kiba husiar bad shim ia ki lad ki lynti ban iada ia ki jingtip ba kyrpang bad ka jinglong kyrpang jong ki.