U Superintendent of Police ka West Jaiñtia Hills District ula pyntip paidbah ba shi bynta ban pyntreikam ïa ka hukum jong ka Central Motor Vehicle Rule-1989 U/S 104, 138 and 138(4) (c), la bthah ïa baroh ki trai bad ki nongñiah kali ba kin pyndait ne tah ïa ki ‘Radium Reflector’ ha ki kali ki mator jong ki kumjuh ïa ki ar shaka, khnang ban lait na kino kino ki jingjia ïatakhuh kali (accident) ba khah khah.
La pyntip ruh ba ka jingpyndait ïa kitei ki Radium ha ki kali mator bad ka jingpynpoi ïa ki FirstAids box sha ki trai bad nongñiah kali hapoh ka West Jaiñtia Hills District kan treikam naduh ka 01.05.2023 tad haduh ka 31.05.2022. La pynbeit ban leh ïa ki Radium Reflector da ki briew ba la buh kyrpang kaba long katkum kane ka dor bad ym dei ban tam: ïa ki ar shaka (Bike, Scooty, Bicycle) ban leh ‘etching’ bad ‘Radium Reflector’ ym donkam jingsiew, ïa ki kali 4 (saw) shaka ban leh etching ka long 20 tyngka bad Radium Reflector 50 tyngka. Ki kali 6 shaka ba kit mar ban tah etching 30 tyngka bad Radium Reflector ka long 100 tyngka, ïa ki kali 10 shaka ban leh Radium Reflector bad First Aid Bok kan long 300 tyngka. Katba kikali sorkar kim donkam jingsiew.
La ïathuh ba ka jingpyndait ïa kine ki Radium Reflector kan ïarap shibun eh ban ïohi ïa ki kali ban wan mar pyrshah khamtam ha ki por mynmiet da kaba pynmeh ïa ka lait kali kumjuh ruh kan ïarap ha ka por mynsngi. Baroh ki Officer Incharge (OCs) bad ki Incharge (ICs) hapoh ka West Jaiñtia Hills kin peit bniah ïa kane ka jingpynbeit khnang ban yn lah ban pyntreikam ha ki kali bad ki ar shaka hapoh ka District.
Lada jia ban don kino kino ki jingujor na ka liang ki paidbah, ïa kane ka yn hap ban tohkit da ki OCs bad ICs bad ïa kane ka jingaibor lah ban weng noh da ka ophis u Superintendent of Police ha kano kano ka por.