U Superintendent of Police ka West Jaintia Hills District u Bikram D. Marak, MPS ula pyntip paidbah ba ka don kawei ka metiap jong u wei u rangbah briew ba la tip kyrteng kum u Gopal Boro kaba dang sah haduh mynta ha Civil Hospital Ialong, Jowai naduh ba ula khlad ha ka 29 tarik u Nohprah (December) 2021.
Kumta na ka liang jong u SP u kyntu ia kiba ha ïing ha sem ne kiba don jingiadei ba kin wan shimti noh ia kane ka met iap jong utei u rangbah.
Kum ban shu pynkynmaw ba ia utei u Gopal Boro la wan pynthiah hapoh katei ka Hospital ha ka 9 tarik u Nailur (September) 2021 bad dei haduh ka 29 tarik u Nohprah ula khlad noh na kane ka pyrthei. Hadien kane la pyndep ia ka Post Mortem bad la buh noh ia katei ka met iap ha ka jaka buh metiap jong katei ka Hospital.
Katkum ka jingai jingtip jong ki Pulit la ong ba une u Gopal Boro u dei u khun jong u Govinda Boro, bad ula don 56 snem ka rta, u dei na ka jait bynriew Boro bad ka niam Hindu. U dei u nongbylla sngi ha ki thaiñ Mynska, u dei trai shnong na Borpata District Assam, u don ruh ia ka phone no: 8014164201.
Kumta kino kino kiba don jingtip ne don jingiadei bad une u rangbah ki lah ban phone ha kine ki number : Jowai PCR- 9774065467 / 03652-220050 lane ha u I/O jong ka case No.9366350267