Ka Dorbar ki Waheh Kur Ri Jaiñtia kaba la long ha kane ka sngi saitjaiñ 2 tarik u Naiwieng, 2024 ha ïing Dobar Hall ka Chilliang Raij Jowai, kila shim ïa ka rai ban buh ka jingkyrpad sha ka Executive Committee jong ka JHADC ba kin thaw noh ïa ki Aiñ na ka bynta ka lawei jong ki Kur ki Jait hapoh u pud u sam ka JHADC.
Ha kane ka sngi kila rai ban kyrpad ïa u CEM JHADC ban ithuh da Aiñ ba kyrpang ïa ka Kur ka Jait na ka Kmie hapoh ka 6 Schedule bad ban pynrung ïa ka Kur ka Jait na ka Kmie ha ka riti treikam ka ri India.
Ha kaba la kyrpad ïa u CEM ban pynkloi noh ban thaw ïa ka Aiñ ban ithuh ïa kito ki Jait Kur kiba shim ïa ka Kur na ka Jait jong ka kmie, na ka bynta kito ki Dorbar/Seng bad ki nongkitkam jong ki, kiba la dep pynpoi sha ka Secretary Executive Committee JHADC kumba la dep buh por da ka EC.
Ha kaba ïadei bad kane ka EC JHADC kan pynkloi ban ithuh ïa ki Kur bad ki Seng/Dorbar Kur bad ban phah noh sha ka ophis Deputy Commissioner, khnang ba ka ophis u Deputy Commissioner jong ka West bad East Jaiñtia District, kin ai ïa ki Schedule Tribe Certificate tang ïa ki Kur kiba la ithuh da ka Aiñ lyngba ka JHADC.
Ka ophis u DC ka West & East Jaiñtia District, kin pyntreikam ïa ka kyndon kaba pan NOC na ki Waheh ka Kur kiba la ithuh da ka Aiñ, ban tehlakam ïa kito ki longkmie kiba ïoh lok bar jylla ki bym dei ki Khasi, ki Pnar, ki War, ki Jaiñtia kiba pan Schedule Tribe certificate ïa ki khun jong ki.
La rai ban kyrpad na u CEM JHADC ban ai por ïa ki Kur kiba ym pat dep pynrung kyrteng ïa ki kur jong ki hapoh ka JHADC.
La shim ïa ka rai ban kyrpad na u CEM JHADC, ban ithuh tang ïa ki Jaiñtia, ki Pnar, ki War bad ki Khasi hapoh u pud treikaam ka JHADC bad kyrpad ïa u Chief Minister ka Sorkar jylla ba un thoh sah u Prime Minister ka ri India, ban ithuh tang ki jaitbynriew Khasi, Jaiñtia bad Garo kum ki trai Ri trai muluk (ST) kiba don hok hapoh ka jylla Meghalaya.