Ki dkhot jong ka Jaiñtia Students Union (JSU), Shillong Circle mynta ka sngi hapoh ka jingïalam u samla Aibanhun Suchiang uba long u Care taker ba peit ïa ka shnad treikam ka JSU Shillong Circle kila leit ban kynduh ïa i Professor kong Sherwin May Sungoh ba long Acting Vice Chancellor jong ka NEHU ban ai ka jingkyrshan ba pura ïa i kum i Acting Vice Chancellor bad ruh ban kyrshan ïa ka Academic Council jong ka Skulbah NEHU-May 21, 2025.
Ka seng ka pynpaw ka jingshaniah ha i kong Sherin May Sungoh ban pynïaid ïa kane ka Skulbah bad ka seng ka kyrmen ba i kong Sungoh in sa ïoh ban bat haduh ka kyrdan Vice-Chancellor jong ka NEHU.
Ka Jaiñtia Students Union (JSU) Shillong Circle ha ryngkat bad ka Jaiñtia Students Union (JSU) Sengkmie ki la ïohi ïa ka kynrum kynram kiba mih hapoh ka Skulbah (NEHU) ha ki snem ba la leit noh hapoh ka jinglong Vice Chancellor Professor u PS Shukla bad na ka liang ki NEHUSU ki la pynshah jur ïa ka jingtreikam jong u Professor Shukla, kaba la wanrah ruh ïa ka jingthuh ha ka pule puthi hapoh kane ka Skulbah ha kine ki snem ba la leit.
Kumba long mynta hapoh ka jingpynpeit jingkhmih jong i kong Sungoh, kane ka Skulbah ka don hapdeng ka shongsuk shongshngaiñ bad ka kam don shuh kano kano ka jingpynwit pynthut ha ka liang ka pule puthi bad ka jingpyniaid ia ki kam ki jam jong ka NEHU, la pynpaw shuh shuh ka JSU.