Ka East Jaintia National Council (EJNC) – Central Executive Council, hadien ba kala sakhi na ka por sha ka por ia ka jing shah iuhroit jong ki Trai Trok kiba don hapoh ka Shatri jong ka JHTOA kiba dei ki Trai Ri, Trai Muluk ha ki Kharkhana pynmih Dewbilat (Cement Factories) kiba don hapoh EJHD, khamtam ha kaba ia dei bad ka dor jong ka baikit baibah ia ki Cement & Clinker.
Naka bynta ban iada ia ka hok jong ki Trai Ri, Trai Muluk na ka jingshah iuhroit ha kine ki Kharkhana pynmih Dewbilat kiba wan nabar jylla tang ban kjit ia ka Spah ka ba ka Mei Mariang ka la kyrkhu ia ki nongshong shnong, kumta na ka liang ka EJNC ka kyrshan pura ia ka jingiakhih jong ka JHTOA ka ba la sdang naduh mynta ka 6/12/2021.
Ha ka jingshisha ha ki khyndiat sngi ba la dep kine ki karkhana ki la mynjur ban ai ïa ka dor baikit thymmai ka ba T.7/- shi metric ton shi kilometre kumba la pynbna da ka sorkar Jylla bad kane ka dor la pynbeit ban pyntreikam naduh ka 15 tarik u Naiwieng, hynrei haduh mynta kim pat ioh ia ka dor baikit baibah thymmai.
Ka EJNC ka dawa na ka Jaintia Hills Cement Manufacturers Association (JHCMA) ba ka dei ban pyntrei kam noh ia katei ka dor bai kit thymmai kumba la dawa da ki nongiailam jong ka JHTOA, pynkut ka khubor ba la phah da u ma Ency Shadap, Vice President EJNC – CEC.
