Jowai: Ka JAC Ri Loom Jaintia ka ba kynthup ia ka AJCVA, MPUF, JYF, HNPF, RJTA ha ka jingialang ka ba la pynlong mynta ka sngi (24/08/2021) ha ophis treikam ka JYF da kawei ka sur ki la rai ban ai ka jingkyrshan ka ba pura ha ka jingiadei bad ka rai ka ba la shim da ki ba ha iing jong u bah Che ban aiti ia ka jingtohkit ha ka Judicial Inquiry bad ban pynshitom ia kito kiba don kti ban siat iap ia u.
Ka JAC ka la bynrap ruh ba ka rai jong ki ba ha iing jong u bah Che ban pynneh ia ka shongsuk shongsaiñ ka long ka ba donkam bha khamtam ha kum kine ki por. Na ka liang ka JAC ka pynkynmaw ba ka long ka ba kloi ban iatreilang ha kano kano ka por ia kano kano ka jingiakhih ka ba ialam da ki ba ha iing jong u bah Che ban ioh ia ka jing bishar ka bakhuid bad ba suba. Kane ka long katkum ka khubor bala pyllait da u ma Paila Kordor.