U Bah A.L.Hek MLA na Pynthorumkhrah u la mih shakhmat ban pynpaw ia ka jingkyrshan na ka bynta ban wanrah ia ka lynti Rel ha ka Jylla da kaba kdew ruh ba katei ka jingthmu kan pynkylla dur ruh ia ka roi ka par hynrei ha kajuh ka por ban pyntikna ruh ba ka jingioh rung kyrthep jong ki mynder kan ym lah ban ioh jaka da lei lei.
U Bah Hek u la ong ba ka lynti Rel kan iarap shibun ia ki nongrep namar da katei ka lynti ka ai jingmyntoi shibun ban kyntiew ia ki dor jong ki jhur bad ki soh. U la ai nuksa ba bun tylli ki jylla ha kane ka thaiñ Shatei Lam Mihngi kiba kynthup ia ka Assam, Arunachal Pradesh ki kiew shibun namar ka jingdon jong ka lynti Rel bad ruh ba ka jylla jong ngi ka don ha ki Khappud China, Nepal bad Bangladesh “Ban iada ia ki nongshong shnong bad ia ka jingioh rung pathar ki mynder ka dei kaba donkam. Ngi hap ban iathir ia kane da ki bor ba dei khmih bad ka jingdon ki paidbah ruh. Ka lynti Rel ka la don ha ka jylla jong ngi, kata ha Mendipathar (Garo Hills) bad ki dei ki Rel kiba kit mar, kumta to ngin pyrshang shwa da ki Rel kiba kit mar. Lada ngi lah ban pynurlong ha Ri-Lum Khasi bad Jaintia, ngin ym iadie ia thied shuh tang ha ki ïew shnong hynrei ngi la lah ban leit sha ki ïew kiba heh jong ki jylla bapher bapher”.
U Myntri u la kyrpad ia kito ki MLA kiba don ha ka liang pyrshah ban wan sha ka rynsan iakren na ka bynta ban iatai ha kaba iadei bad kane ka mat khamtam ban iakren ruh ia ka jingioh rung pathar lada wanrah ia ka lynti Rel. U la ong ba kane ka jingthmu ka dei ban wad ia ki lad ki lynti na ka bynta ban wanrah ia ka roi ka par bad ha kajuh ka por ban ai ia ka jingiada kaba tina.