Ka Dorbar mang tyngka 2026-27, jong ka Jaiñtia Hills Autonomous District Council (JHADC), kaba long ka sngi balai bad kaba kut noh mynta ka sngi 20.03.2026, na ka liang u ma Rikut Parein, u la kylli balei ba ka Official Website jong ka Council kumba long haduh mynta la hynñiew tylli ki snem kam shym la treikam shuh, la ka dei na ka daw jong ka jing bym don pisa ban pynshna ne khlem update shuh ia ka, ne ba don ki jingthut ha ka liang ka technical bad kane ka wanrah ka jingjah burom ia ka Council ha kaba wat tang ka website ruh kam don.
U la ong ba kumba long mynta ki sngi ka jingdon jong ki web-site jong kino kino ki organization, ki kynhun, ki seng bad kiwei de, ka long kaba donkam bha ha kine ki sngi ban don ia ka website, namar kumba la tip ba kine ki sngi ki long ki sngi jong ka digital. U la ong ba ka jingdon jong ka website kan iarap bad pynsuk ia ki nongtrei ka council kumjuh ruh ia ki paidbah ha kiba bun ki liang kum ha ka ban upload ia ki kot ki sla ba donkam bad wat ia ki khynnah skul ruh haba ki donkam ban wad bniah ne leh research ha kino kino ki por.
Ha ka jingiadei bad kane na ka liang u EM Incharge, u ma M. Swer, uba dei peit ia kane ka bynta, u la ong ba kumba long mynta ka jingpynshna ia kane ka website jong ka JHADC ka dang iaid shakhmat, lah ruh ban thaw ne shna noh da kaba thymmai bad pynduh noh ia kaba rim.
