Kum shi bynta na ka jingpynkhreh ia ka State Level Mock Exercise halor ka jingpynjulor u jumai ka ban sdang ha ka 12 tarik u Risaw, 2023, ka Meghalaya State Disaster Management Authority(MSDMA), ka Revenue & Disaster Management Department jong ka sorkar Meghalaya ha ryngkat ka jingiatrei lang bad ka National Disaster Management Authority (NDMA), Ministry of Home Affairs ka sorkar pdeng mynta ka sngi ka la pynlong ia ka Table Top Exercise na ka bynta baroh ki seng ne kynhun kiba don bynta ha State Convention Centre, Shillong. Jan baroh ki District ka jylla ki la snoh kti lang ha kane ka Table Top Exercise.
U Commissioner & Secretary ka sorkar jylla uba peit ia ka Revenue & Disaster Management Department, u Sanjay Goyal ha ka jingkren plie u la ong bad ka Table top Exercise ka long ka jingmait lynti ia ka mock exercise bad ula ban jur ruh ba kane ka exercise ka long ban iarap ban pynithuh bad pynsngewthuh ia ki seng ne ki kynhun ba don bynta ban tip ia la ki kamram bad ki kam jong ki ha ka sngi pynlong ia ka mock drill bad kumjuh ban pyntikna ba kane ka jingpynlong ia ka state level mock drill kan long kaba jop.
U la kren ban jur ba kumba ka jylla Meghalaya ka juh long ka jylla kaba ju khie bha u jumaiñ bad kaba lah ban wanrah ia ka jingjulor kaba jur, ka kam kaba nyngkong eh nalor kiwei pat ki jingjia ba sngewsih ka long ban long kiba la pynkhreh lupa haba jia ka jingkhie u jumaiñ. U la kyntuh ia ki seng bad ki kynhun ba don bynta ban shim khia ia baroh ki exercise bad ban khmih thuh da lade haduh katno ka jylla hi baroh kawei ka la long kaba la pynkhreh ban ialeh ia kino kino ki jingjia ba sngewsih.
La pyniaid ia kane ka Table Top Exercise da u Sanjay Goyal, Commissioner & Secretary, Revenue & Disaster Management Department ha ka jingiadon lang u Maj. Gen. Sudhir Bahl (Retd), uba long u Senior Consultant(ME & IRS), NDMA. Hapdeng kane ka exercise, la wanrah ruh ia ki PPT presentation da ka MSDA, DDMA (East Khasi Hills District), PWD (R&B) bad NDRF. La ioh ruh ia ki jingai jingmut na ki seng ne kynhun ba don bynta, bad na kiwei pat ki district kaba ia dei bad kiwei pat ki jingjia.
Ka jingthmu jong kane ka Mock Exercise ka long ban khmih ba ka Disaster Management plan bad ki SOPs jong ka Jylla bad ki district, kumjuh ruh na ka bynta ka individual Disaster Management Plans jong kawei pa kawei ka tnad treikam sorkar, ban kdew ia ki kamram bad ki jingkitkhlieh jong kiba bun ki seng ne ki kynhun ba don bynta katkum ka Incident Response System (IRS), ban pyntikna ia ka jingiatrei lang hapdeng baroh ki Emergency Support Function (ESFs), ban pyntip bad pynshai paidbah bad ban tip hangno don ka jingduna, lada don, ha ki lad jingiarap, ka jingpyntip, ka jinglah ban iarap bad kiwei de.
Lah ban batai ba yn pynlong ia ka State Level Mock Exercise halor u jumaiñ ha ka 12 tarik u Risaw, 2023 ha baroh ki 12 tylli ki district ka jylla Meghalaya.
