Ha ka janmiet jong ka 26 tarik Kyllalyngkot 2024, ka jingphoh sniew jong ka kong Lily Tariang, kaba shong ba sah ha ka shnong Hawai Bhoi kaba hap hapoh ka Amlarem C&RD Block, West Jaintia Hills District kala urlong, ha kaba u Additional Deputy Commissioner bad Project Director jong DRDA West Jaintia Hills u bah F B Basan ryngkat kiwei de ki la ioh ban aiti ia ka ïing sah sha katei ka longkmie ba kyrduh.
Ia katei ka ïingsah la tei lyngba ka Pradhan Mantri Awas Yojana – Gramin (PMAY-G) ryngkat ka jingiarap jong ka Jaiñtia Hills Development Society lyngba ka KHUBLEI Germany ryngkat bad kiwei de ki jingiarap kala kot sha ka Rs. 3, 32,000/- . Ka jingnoh synniang lyngba ka PMAY ka long Rs. 1,30,000/-, lyngba ka MGNREGA ka long Rs. 22,000/-, na ka KHUBLEI Germany Rs. 1,70,000/- bad na ka Pynskhem Village Organisation (VO) ka la noh synniang Rs.10,000/-.
Kane ka ïingsah kan ai jingmyntoi bad jingiadap ia katei ka longkmie u lok jong ka ryngkat ki lai ngut ki khun ksiew kiba la duh noh ia ka kmie bad mynta kila iashon iasah ryngkat bad kine ki kmierat kparat jong ki.
Ha katei ka sngi nalor u Additional Deputy Commissioner and Project Director DRDA u bah F.B Basan, MCS, la donlang ruh u SDO Amlarem Civil Sub-Division, Amlarem Dr. Abhishek Saini, IAS, u Assistant Commissioner and Amlarem C&RD Block Development Officer G L C Mylliem, u Director JHDS Fr. Manbha Pakem, ki nongtrei ka MSRLS, ki dkhot SHG ki nongshong shnong bad kiwei.
U bah F. B Basan, haba kren u la iathuh ba ka PMAY (G) kadei kawei na ki thong jong ka sorkar India ban pynioh ïing ia kiba duk ha ki thaiñ nyngkyndong. U la ong lyngba kane ka skim hadien ba la dep ban shna la aiti beit sha ki nongioh myntoi. Shuh shuh u la iathuh ba kane kadei ka sien kaba ar bala iatreilang bad JHDS, kaba nyngkong ka long ha shnong Moosakhia kaba la aiti ia ka ïing sha ka nongioh myntoi ha ka 23 u Nohprah, 2023.
U bah Basan u ong ba ka jingiatrei lang na ka bynta ban wanrah ia ka roi ka par ka long kaba donkam haduh katta katta kumjuh ka jingiatylli bad ka jingiasnohkti lang ka pynlah ban poi sha ka thong. U la ai khublei kyrpang ruh ia ka KHUBLEI Germany lyngba ka JHDS kala la iasnohkti lang ban tei ia kane ka ïing bad khmih lynti ba kan dang iai bteng shuh shuh ka jingiadei kam ha ki snem ban wan. Kumjuh ia ka ophis jong u BDO Amarem, ia ki nongialamshnong, nongialam ka VO kiba la shimkhia ban pyndep tei ia kane ka ïing tang hapoh 90 sngi.
Na ka liang ka kong Lily bad u lok jong ka, ki pynpaw ka jingkmen bad ka jingsngewnguh ia baroh kiba don bynta ban pynioh ia ki, ia kane ka ïingsah kaba itynnad bad ba skhem bha.
