Ka Shnong Lakadong Ummat ka la shong dum mynta la jan dap ar bnai kynthih na ka daw jong ka jingsniew noh jong u Transformer ba pynpoi bor ding ha katei ka shnong. Ha ka jingiadei bad kane ka jingeh jong ki paidbah nongshong shnong na ka liang ka FKJGP Lakadong Ummat Unit kala dawa na ka MePDCL ba ka dei ban pynioh noh da u transformer ba thymmai hapoh shnong.
Na ka liang jong ki nongialam ka Unit ba kynthup ia u bah Leki Hynthong uba dei u President bad u bah Kymmoobha Patwad General Secretary kila leit ban ia kynduh ia u bah K. Iakai Asstt. Executive Engineer ka Khliehriat Distribution Sub-Division MePDCL Khliehriat hynnin ka sngi ha ophis treikam jong u bad buh ruh da ka jingthoh ban kyrpad ia kane ka tnad pynioh bording ba ka dei ban pynioh noh da u Transforment ba thymmai hapoh ka shnong Lakadong Ummat.
Na ka liang jong une u sahep ula ong ba ka don ruh ka jingbym shim khia jong ki katto kattne ki nongshong shnong ban siew ia ka bill lait bad kane hi kala wanrah jingeh ia ka ophis ban ioh pynbiang ia ia ki transformer wut wut haba jia kum kine ki jingjia.
Hynrei na ka liang jong u bah Leki Hynthong ula ong ba kane ka jingdon ki katto katne ki bym siew tista ia ki Bill kam dei pat ban ktah ia kiwei pat kiba siew thikna ia ka Bill lait. Kumta u kyntu ia ka ophis ba ka dei ka kamram jong ki ban leh ia kaba donkam na ka bynta kito ki bym siew bill lait, hynrei ym ban buh jingeh ia kiba bun ba lang ne ia ka shnong hi baroh kawei. Ka seng ka pyntip ruh ba kan iai bud dien ia kane bad kan ym shong kli kti tad haduh ba ka ophis MePDCL kan da pynioh ia ka jingdawa jong ki nongshong shnong.