Ka Federation of Khasi Jaiñtia & Garo People (FKJGP) War Jaiñtia Circle ha ka jingïalam u President ma Bahshlur Mukhim bad u General Secretary ma Namdichai Lamare kila leit ban jurip ïa ka Padu State Dispensary ha ka 10/05/2025 ha ryngkat ka jingïadon lang u General Secretary ka seng kmie bah Eldie N. Lyngdoh, President West Jaiñtia Hills ma Marhok Marboh lem bad ki dkhot jong ka seng.
Ha kane ka jingleit jurip ka seng kala ïoh ban ïakren bad u Dr. A. Khonglah shaphang ki jingdonkam kane ka State Dispensary, kum ban pynkynmaw biang ka seng ka la dep ban dawa na ka sorkar ha ki snem ba la dep kata naduh 2012 ban kyntiew kyrdan noh ïa kane ka Dispensary sha ka PHC katkum ka jingdawa bad ka jingdonkam ka thaiñ namar ka State Dispensary ka dang duna ka jingshakri ïa u paidbah ka thaiñ khamtam ha kum kane ka juk ba mynta ba bun ki jingpang ba laiphew jait.
Na ka liang ka seng kala dawa jur ban pynurlong kham kloi ïa ka jingdawa bad ki jingdonkam jong ki paidbah, ïa kaba ka sorkar ka dei ban shim khia khnang ba kin ïoh ka jingshakri kaba biang hapoh katei ka thaiñ, la ong ka seng.
Halor kane ka jingdawa ka seng kan ïai buddien ha kaba ïadei bad kane ka kam kaba long ruh ka kam ïap kam im jong u paidbah nongshong shnong jong ka thaiñ.
