U kyrtong ka Congress na ka 13-Saphai Sahsniang u ma Rikut Parein ula pynsngew kumba long mynta ki aiñ hapoh ka District Council ki long kiba la tlot shaba palat wat ka rukom treikam ruh kam ïadei shuh bad kane ka juk ba mynta.
Da kaba u ai nuksa ha ba apply ïa ki Land Holding Certificate bad ki Patta la hap ban ïenglaiñ tang ban ïoh ïa ka bai stamp bad kane kala ktah shibun eh ïa ka por jong ki paidbah, u la ong ka por kala dawan ban pyntrei noh da ki bor jong ka juk Internet bad Computer ne Digitalization khnang ban ïoh pyndap ïa ki kot jaka bad ban siew online lyngba ki Common Service Centre. La donkam banpynkhlaiñ bad ban ai bor ïa ki Dorbar Elaka bad ki Dorbar Shnong ban pynneh ïaka jinglong kyrpang jong ka jaitbynriew, ong u ma Rikut.
Shuh shuh u la ban jur ka District Council ka don ïa ka tnad Market bad la dei ban pynbha ïa kane ban ïoh kam ki khun samla da kaba thaw ïa ki ïew dielang (Wholesale Market), khnang ba ki briew ba nabar kin nym ïoh lad ban pynhiar dor ïa ki mar rep kum u synsar bad u shynrai. Kum u kyrtong MDC lada u wan ha ka jingjop un ïaleh ban pynkiew ïa ka kam jngohkai pyrthei ha ki thaiñ jong ka Saphai bad Iooksi namar ka jingdon jong ka Wah Kulpi, kumjuh ïa ka thaiñ Sahsniang ba don ka Wah Myntang.
Khnang ba ki khun samla kin ïoh lad ban seng ïa ki kam kum ka jaka sah Home Stay na ka bynta ki briew kiba nabar. U ong la donkam mynta ïa ka District Council ban ai ïa ka syrnot Schedule Tribe Certificate sha kitrai jylla, kata ka long ban thaw ïa ka aiñ ba thymmai. La donkam ruh ban pynbun ïa ki tnad treikam hapoh ka Council bad ban pynkup bor ïa ka JHADC katkum ka Riti synshar ka ri.
Na ka liang u ma Rikut Parein ula pynpaw kum u briew uba wan na ka longïing ba duk, ula buh ka jingkyrpad na ki paidbah, ki longkmie, ki longkpa bad ki khun samla ba kin ai ka jingkyrshan ba pura, da ka mynsiem jingïaieit, ula ong lada u jop ïa kane ka Election ka dei ka jingjop ïa ka spah bym khuid bad ka jingjop ïa ki kup shilliang ki sem shilliang, ki nongrep bad ki nongbylla sngi.