Mynta ka sngi ka District Disaster Management Authority, East Jaintia Hills District, Khliehriat ha ka jingiatrei ryngkat bad ka National Disaster Response Force (NDRF) kila pynlong ia ka jingai jinghikai kumno ban pynkhreh lada jia ba wan lynshop u jumai uba khlaiñbor haduh 7.8 Richter Scale da kaba pynlong ia ka Mock Drill ha madan ialehkai jong ka Khliehriat Higher Secondary School.
Ha kane ka Mock Drill ki briew jong ka NDRF bad na ka tnad Civil Defence and Home Gruards kila pyni nuksa kumno ban iarap ia kito ki lanot kiba ngat ha kane ka jinglynshop u jumai.
Ia kane ka mock drill la leh janai bha katkum ka Incident Response System (IRS) kaba kynthup ia ka jingdon ki Responsible Officer (RO), ki Incident Commander, ki Operation Section, ki Planning Section, ba ki Logistic Section, kaba pyni ruh ia ka jingiashim bynta da ki khynnah skul, ki nonghikai, ki community volunteer, MPRO, Police, Health, Fire and Emergency Service bad kiwei de ki tnad kiba dei ban don bynta ha ki jinglynshop mariang.
Hadien ba la kut kane ka mock drill kala don ka jingbatai lyngkot halor ka jingthmu jong kane ka drill da ki nongpeit pyrman jong ka NDRF u Inspector R.L Danla bad Sub-Inspector Civil Defense bad Home Guards u ma Y. Challam.
La ioh ruh ka jingkren na u Deputy Commissioner cum Chairman District Disaster Management Authority ka East Jaintia Hills District u A. Baranwal, IAS. U DC ula ong ba ka jingpynkhreh ia ka jingwan lynshop jong kino kino ki bor mariang ka long kum ka jingkynshew kaba lah ban iada ialade bad ia ka iing ka sem. Kumta u kyntu ia ki tnat sorkar kiba don bynta ba ki dei ban shim khiah bha ban pynlong ia kum kine ki drill khnang ba kan ai jingshemphang ia ka imlang ka sahlang lada wan jia kine ki jinglynshop mariang.
Hynnin ka sngi kala don ruh ka jingai jinghikai ha Khliehriat West Community Hall ha kaba la ioh ia ka jinghikai na u Dr. M. Kharkongor ba dei u Consultant DDMA ka Ri Bhoi District. Ka kynhun NDRF kala pyni nuksa ruh halor ka rukom wad bad pyllait im haba jia kine ki jingjia.
