Ki samla pule ka Khadar Dalloi Law College, Jowai mynta ka sngi kila shim bynta ha ka jingïatainia (Debate) halor ka phang “Prisoners in India should be allowed to cast their vote during election”, lane ban ailad ïa ki koidi hapoh ka Ri India ban ïoh bynta lang ha ka jingïathep vote ha ka por Election, ïa kane ka prokram la pynlong ha Khadar Dalloi Law College, Jowai.
Na ka liang ki samla pule ka Khadar Dalloi Law College, Jowai, kila shim bynta na baroh ar liang mamla, katba ka B Majaw, Secretary of District Legal Service Authority (DLSA), West Jaiñtia Hills kala long ka nongbishar ban shim ïa ka rai jong ki ar kynhun.
U N. A Khan, District & Session Judge, West Jaiñtia Hills, haba ai jingkren ha shwa ban sdang ka prokram ula pynpaw halor ka jingdonkam jong kane ka phang kaba don jingïadei bad ka synshar paidbah, ka jinglong aiñ bad ka lad jingpynkhiah.
Ha ka juh ka por ula kyntu ïa ki samla pule kiba ïashim bynta, ba kin pynsngew shibun ki jingpynshong nongrim jong ki lyngba kane ka jingïathir, khnang ba ka kan long ka jingïatai kaba seisoh.
Na ka liang ki samla kiba ïashim bynta kila pyni shisha ïala ki jong ki nongrim, na ka bynta kiba kyrshan kila pynleit jingmut halor ka hok jong ka synshar paidbha bad ki lad jingsumar, katba kiba pyrshah kila pyni halor ka jingbymshngaiñ bad kaba long pyrshah ïa ka aiñ.
Ïa ka nam best team la ïoh da ka liang ba pyrshah ïa kane ka motion, katba u E. Syngkon u la ïoh ïa ka nam best speaker uba kyrshan ïa ka motion.
ïa kane ka debate la pynïaid da u bah F.B Passah, Assistant Legal Aid Defense Counsel bad ïa ki kyntien ai khublei la ïoh na u bah I. Khyriem, Principal Khadar Dalloi Law College, Jowai.
