Ka JSU kala pynrem jur iaka sorkar MDA namar kane ka sorkar kam peit kam khmih ia ka roi ka par jong ka East Jaintia Hills Distrik kaba dei kawei na ki Distrik hapoh ka jylla Meghalaya kaba lah jan dap 10 snem mynta naduh ba lah phiah ia ka na ka Jaintia Hills Distrik ha u snem 2012.
Ka seng lyngba ka Khliehriat Circle ka pynrem jur ia ka jingiehbeiñ ka sorkar MDA ia kane ka Distrik wat la bun ki khajna ka mih na ka East Jaintia hynrei ka sorkar ka leh bym patiaw iaka hok u paitbah jong ka East Jaintia Hills Distrik. Ka seng kam lah ban shu sngap jar halor kane ka bynta namar dang bun bah ka roi ka par kam pat don ha kane ka Distrik lada phai ha ka Civil Hospital lane sha ka skul sorkar lane ka kolej sorkar, wad ki surok haduh mynta kim pat biang na shnong Bataw sha Lama, Borghat sha Hungaria bad Huroi ka dang sniew shaba palat bad ka sorkar ka dang leh mynthi haduh mynta mynne ban pynbha iaki surok ki synkieng hapoh ka Distrik.
Ka seng ka phah iaka khubor sha ka sorkar jylla ba ymdei ban shu leh politiks ban phiah ne pynmih tang ki Distrik hapoh ka jylla hynrei ka sorkar kadei hok ban wanrah shuwa ia ka roi ka par ha ki District ki ba lah rim ym ban pynlut por ban phiah Distrik khlem da wanrah iaka roi ka par ban pynsuk ia u paitbah khamtam iaki nongkyndong ban pynbiang iaki hospital sorkar bad ki jaka pule sorkar. Ka seng ka lah ong kumba long mynta ka Hospital Civil kaba don ha Jowai ka khap ngiah namar ki nongshong shnong na East Jaintia Hills Distrik kim pat don la ka Civil Hospital bad ki khynnah pule na East Jaintia ki dang wan sha Jowai, West Jaintia Hills namar ym pat don ki jaka pule sorkar kiba paka haduh mynta bad dei na kane ka daw ba bun na ki khynnah klass kim pat ioh admission ha ki kolej.