“Ki bor pulit, ki bor shnong bad ki riew paidbah ki ïa don bynta ban wad ïa ki shikurim kiba la jah”
Hadien 4 sngi ba ki shi kurim na Madya Pradesh kiba la wan kai ha Sohra ki la jah rngai khlem ioh jingtip satia haduh mynta, u Myntri Rangbah Conrad K. Sangma u la pynshai ba ka Sorkar Jylla ka shimkhia bha halor kane ka jingjia ba sngewsih bad ryngkat u S.P. bad baroh ki bor pulit, ki bor Shnong ka thaiñ Sohra ki la iasnohkti lang ban iawad sngewlem ia kitei ki arngut kiba la wan kai sngewbha hadien ba ki la dep iathoh shongkurim.
U Myntri Rangbah u ong ba u Myntri Rangbah ka Madya Pradesh bad u Myntri Kam pohïing ka Ri ruh ki la phone ia u na ka bynta ban shimkhia bad pynsted ia katei ka kam. “Ngi la pyndonkam baroh ki kor kiba katkum kane ka juk ia kiba ngi don. Kumba phi tip kane kadei ka aiom slap bad ka jylla jong ngi ka paw bha ha ka pyrthei kum ka jylla ba jur slap, kumta na ka liang jong ngi, ngi la pyndonkam baroh ki buit khlem da aidaw. Hooid ka long ka kam kaba eh, hynrei ngi la leh ia kaba bha ban pyntikna ba ngin ioh ia kitei ki shi jur”.
U Sangma u la pynkynmaw ba kitei ki shijur ki la leit sha bun tylli ki jaka bad la lap ruh ia ka Scooty jong ki narud surok. U la antad ruh ba katkum ka jingpynieng ia katei ka ar shaka ka dei ba kitei arngut ki la hap ban iaid da ki kjat na ka bynta ban poi sha kawei pat ka jaka bad ha kitei ki jaka ba don katei ka Scooty ka dei ka jaka kaba btuid bha namar ka dei ka aiom lyiur.
U Myntri Rangbah u la pyntikna ba ka Jylla Meghalaya ka dei ka jylla kaba shngaiñ bad haba wan ki Nongjngoh kai pyrthei, ki briew ki burom bad khein beit kum shi ïing shi sem khamtam ki briew na Sohra ki pdiang sngewbha bad sngew shiïing ia baroh ki nongwei ba wan shangkai sha ka thaiñ jong ki.