U District Election Officer (DEO) jong ka West Khasi Hills District u ma Garod L.S.N Kykes, IAS, ula pynmih ia ka hukum ba la khang ia kino kino ki briew ban ai ki jingtyrwa ha ka dur jong ka pisa, ka kyiad, ki tiar ai sngewbha lane wat ka jingbam ba ai ei sha ki nongthep vote katba dang iaid ka samoi Elekshon sha ka ïing Dorbar Thawaiñ jong ka Lok Sabha.
Lada lap ia kino kino kiba ai bad kiba pdiang ia kine ki jingtyrwa kin ngat ha ka jingpynshitom jong ka aiñ da kaba shah set phatok haduh shisnem ryngkat ka kuna.
Ki bor pyniaid Elekshon jong ka West Khasi Hills ki la buh ia ki Flying Squads bad ki Surveillance Teams ban peit thuh bha halor kane ka kam katba dang iaid ka samoi Elekshon.
Na ka liang jong u DEO ula buh ka jingkyntu ia kino kino ki riew paidbah kiba lap ba don kum kane ka jingtyrwa bad jingpdiang kin pyntip mar mar sha ka Complaint Monitoring Cell kaba la buh hapoh ka District da kaba phone ha u Toll Free number 1950 bad lah ruh ban ujor lyngba ka C-VIGIL App.