Kum shi bynta na ka jingïaid shaphrang jong ka jingrakhe ia ka prokram jong ka District Level Nasha Mukt Bharat Abhiyan la pynlong ïa ka prokram pynshai paidbah ha Kiang Nangbah Govt. College, Jowai, ïa kaba la pynlong da ka District Social Welfare Officer, Jowai halor ka phang “A National Movement towards a drug free India”.
Ka kong Y. Najiar, DSWO ha ka jingkren lamphang kala kdew ïa jingsngewkhia halor ka jingkiew sted jong ka jingdon ki nongdih drug, khamtam ki khun samla. Ka la ong ba ka Nasha Mukt Bharat Abhiyan kam dei tang ka jingïalap na ka liang ka sorkar hynrei ka dei ka jingïasnohkti long jong ki nongshong shnong jong ka Ri baroh kawei da ka jingthmu ban ai ka jingïada na ka bynta ka lawei ban wan jong ka ri.
Kala pynshlur ïa ki samla pule ym dei ban lait tang na u drug hynrei dei ban long ki nuksa jong ka jingkylla ha ki jaka pule jong ki bad ha ka imlang sahlang jong ki. Ka ong ba ka sur jong ki samla ka don ïa ka bor ban ai ka jingpynshai bad pynsngewthuh ba ïaineh sha kiwei.
La ïoh ruh ka jingkren na u ma F. Passah, Assistant Legal Aid Defence Counsel jong ka District Legal Service Authority, uba la kren shaphang ki aiñ kiba ïadei bad ka jingdih drug hapoh ka ri India bad kumno ki don ka jingïasnoh ha ka Constitution jong ka ri. U la batai shaphang ka Narcotic drugs and Psychotropic Substance (NDPS) Act 1985 bad kiwei de kiba ïadei bad ki khun samla.
U Chibait Langstang, (Taekwondo) Brand Ambassador jong ka District Level Nasha Mukt Bharat Abhiyan Campaign, ula ai jingkyrmen ïa ki samla pule bad ïathuh ïa ka lynti ïaid jong u ha kam Martial Arts. U kyntu ïa ki samla pule ban jied ïa ki kam sport bad ka jingkoit jingkhiah ha ka jaka jong ki jingmlien kiba sniew.
Na ka liang jong u bah Barry L. Kharmalki, General Secretary, Meghalaya State Network of Positive People, Shillong uba don ïa ka jingpang Positive ula ïathuh ïa ka jingïaid lynti ba jwat jong u bad kumno ula jop bad poi sha ka jingkylla. Ula kyntu jur ïa ki samla pule ban long kiba stad ban jied ïa ki lynti ha ka jingim bad pynkynmaw ïa ki ba ka jingkylla ka long kaba lah. U la kyntu ruh ïa ki samla ban kiar na ki jait jingmlien kiba sniew bad ban don ka jingngeit ha ka bor lade.
