Ka jingpan jaka sah (Booking) ha ki Meghalaya House kiba don ha kylleng jong ka ri India mynta ka la long kaba suk, hadien ba ka Sorkar kala ai lad ne shah ia ki nongshong shnong ba kin Book online ia kano kano ka Meghalaya House kaba ki donkam ban sah.
Ia kane ka jingpynkylla Digital ia ka rukom trei la pyllait paidbah mynta ka sngi 11/03/2026 da u Myntri ka Sorkar Jylla ba dei peit ia ka General Administration Department u bah Sosthenes Sohtun, ha ka jingiadonlang u Subir Marak, MLA na Rangsakona Constituency, u Sampath Kumar, IAS, uba dei u Resident Commissioner, Meghalaya House, New Delhi, u Ramjumar S, IAS, Officer on Special Duty, Meghalaya House, Vellore, ki Additional Resident Commissioner, Meghalaya House, New Delhi, Meghalaya House Mumbai, Meghalaya House Kolkata bad jong ka Meghalaya House Guwahati, nalor ki Secretary, General Administration Department, ki nongtrei ka NIC, ki Joint Secretary nalor kiwei de.
Ka jingpynlong online ia kane ka rukom (Booking System) kan iarap shibun ia ki nongleit nongwan ban buh ne pan bhah ban ioh sah ha kitei ki jaka sah jong ka sorkar (Meghalaya House). Ia kane ka system la pynshna bad pynbit pynbiang da ka National Informatics Centre (NIC), Meghalaya kaba long ruh shi bynta na jingthmu jong ka Sorkar ban kyntiew ia ka Digital Governance bad pynbha shuh shuh ia ka jingpynpoi sha ki nongshong shnong bad ki nongtrei sorkar.
Ki nongshong shnong ki lah ban book ia ki kamra, ki dormitories lane ki conference hall da kaba phah da ki SMS lane da kaba leit ha ka website https://gad.meghalaya.gov.in/meghouse/ lane da kaba scan ia u QR uba ki ioh ha ka application jong ki lyngba ka SMS.
