La mana ban khar shyiap, tih maw ne bret pathar ïa ki ñiut sha ka Wah Myntdu: DM

U District Magistrate ka West Jaiñtia Hills ula pynmih ïa ka hukum hapoh ka kyndon Section 163 BNSS, kaba khang pyrshah ïa baroh ba ym bit shuh ban khar shyiap bad ban tih maw ha shi lynter ki bynta jong ka Wah Myntdu kaba long ka nongbsa umbam ïa ka sor Jowai.
Kane ka hukum kala khang pyrshah kumjuh ban sait jaiñ, sait kali bad bret pathar ïa ki ñiut ne ki jakhlia sha ki bynta ka Wah Myntdu, la khang ruh ban theh khyndew pathar sha ki bynta ka wah na ka jingpyntrei surok.
La pyntreikam ïa kane ka hukum ka long hadien bala ïoh ka jingujor halor ka jinglong jingman bad ka jingbym khuid shuh ka um bad ka jingdap khyndew palat ka Wah Myntdu naduh kine ki snem bala dep, kane ka jingshah pynjaboh jong ka Wah kala ktah ruh ïa ki dohum dohwah, ki mrad ki mreng bad kumjuh ïa ki sawdong sawkun ka mariang.
Kino kino kiba leh pyrshah ïa kitei ki jingmana bala kdew haneng ki lah ban shah pynshitom katkum ki kyndon aiñ, khnang ba yn wanrah ïa ka jingkhuid jingsuba jong ka Wah Myntdu baroh kawei.