U District Magistrate (DM) jong ka East Jaiñtia Hills District u A. Baranwal IAS, ula ioh jingtip ba kum ha kine ki por ba don ka jingsahkut kali kaba da ki bun bun kynta, kila don bun ki kali kiba ieng sah halor ki jingkieng kiba don ha u surok NH-6 ha shilynter naduh ka shnong Lumshnong haduh ban da poi sha Malidor.
Kumta u District Magistrate ula pyntip ba bun na kitei ki jingkieng kiba don ha shi lynter ki long kiba la tor bad kiba donkam ka jingmaramot kumta kam long kaba shngaiñ ia ki kali ban ieng halor jong ki. Kane ka lah ban wanrah pynban ia ka jingjia ba sngewsih lada pynieng sah halor kitei ki jingkieng.
Kumta u DM ula pyntreikam syndon da ka kyndon 144 CrPC ka ban khang ia kino kino ki kali ban pynieng sah halor jong ki jingkieng haba jia ka jingsahkut kali ha shilynter utei u surok, na ka daw jong ka jingtwa ki lum bad ka jingwantuid jong ka khyndew bad ki maw na sharinglum sha ki bynta jong u surok bah NH-6.
Kane ka hukum kan treikam noh mardor bad kan bteng tad haduh ban da pynmih da kawei pat ka hukum.