Ka Dorbar ba Kyrpang (Special Session) jong ka Jaiñtia Hills Autonomous District Council (JHADC) kaba la sdang naduh nynnin ka sngi 7 tarik u Nailar bad mynta ka sngi ba ar 8 tarik u Nailar 2024 kala mynjur ïa ka Bills “The Jaiñtia Hills Autonomous District (Constitution of District Council) (Amendment) Bill, 2024”.
Hashwa ban shim ïaka jingmynjur kala don ka jingïatai halor ka rukom phiah Constituency thymmai da ka Delimitation Committee, ïa kaba la dep rai da ka Executive Committee hashwa ban wanrah hapoh ka Dorbar kyrpang ka JHADC.
Kiba bun hi na ki MDC naduh ka liang pyrshah bad kumjuh naka liang synshar kiba kynthup ïa u ma Amdrew Shullai, ma Arbor Hima Darnei, ma Richard Lyngdoh, ma Brightstar Chyrmang, ma Lomris Lyngdoh, ma Finelyness Bareh, ma J. Treilang Suchiang, ma Robinus Syngkon, ma Aiborlang Shadap, ma Lakhon Biam, ma Saron Pasweth bad u ma Dawan Lyngdoh kiba pynsngew ïa ki jingbymhun ïa kane ka jingphiah Constituency thymmai da kaba pynsngew ba ki don ki shnong ki bym sngewdei ban hap hapoh ka Constituency katkum ka jinglong jingman jong ka jaka (Geographical).
Kiba bun hi na kitei ki MDC kila kynthoh ïa ka Delimitation Committee ïa kaba la thung kyrpang bad la ai bor laidluid haka da ka JHADC ban leh ïa kane ka kam, shuh shuh kila pynpaw ka jingbym sngewhun ïaka rukom phiah Constituency thymmai wat hapdeng kiba bun kiba pyrshah ha ki jingpynsngew paidbah (Public Hearing) ha kine ki sngi bala dep. Ki don ruh ki MDC kiba la dawa ban phah shwa sha ka Selection Committee ba kan pynbeit thymmai hashwa ban pdiang ïa ka bad kila don ruh kiba kynthoh ïa ka Executive Committee kaba la pdiang kyrkieh ïa kane ka report.
Na ka liang u Chief Executive Member ka JHADC ma Thombor Shiwat ula pynsngew ïa ka report jong ka Delimitation Committee kaba la dep ban submit sha ka Executive Committee ïa kaba la dep ban jurip bniah khlem da leh shilliang ïa uno uno u MDC. U CEM ula pynsngew ruh baroh ka Total Vote jong ka East bad West Jaiñtia ki don haduh Lai Lak San hajar Ar spah tam.
Ïa ka Dorbar mynta ka sngi la pynïaid da u shnongknor ka JHADC u Dr. Sanki Shangpung, bad ha ka por nohphai sngi ha ka sien shong kaba ar (Second Setting) la shim ïa ka rai ban pdiang ïa ka Bills da u Vice Chairman ka JHADC ma Het Pohthmi uba la pynkut ruh ïa ka Dorbar. Kine ki 29 tylli ki Constituency bala pynbeit thymmai hapoh ka JHADC ki kynthup ïa ka War-East, War-Central, War-West, Amwi-Khliehtyrshi, Mukhla-Ummulong, Moodymmai-Nongkhroh, Nartiang-Wahiajer, Moodop-Umladang, Mynso-Nongjngi, Mynsngat-Khanduli, Shilliang Myntang, Barato-Mukroh, Saphai-Sahsniang, Mowkaiaw, Raliang, Shangpung, Nangbah-Mihmyntdu, Jowai-North, Jowai-South, Muthlong-Sohkymphor, Tuber-Wapungshnong, Musniang-Rangad, Rymbai-Khliehriat, Sutnga-Narwan, Sutnga-Nongkhlieh, Sumer, Saipung-Nongkhlieh, Narpuh bad ka Bataw-Lakadong Constituency.