Ia ka Futsal Play Ground, ia kaba la ai nam kum ka Football Factory Spaiñ Nangbah, kaba long trai da u Albinus H.L. Laskor, la plie bad kyrkhuh kyrdoh ia ka ha ka 07/03/2026 da u Pastor Rev. S.S. Nongrum ha ka jingiadonlang ki Tymmenbasan, MDC, kiba haïing hasem ka jait Laskor, ki nongshah khot sngewbha bad da ki spah ngut ki samla (kynthei bad shynrang), ki khynnah kiba ieid Football (kynjatbol).
Ha shwa ban plie paidbah ia kane ka madan la pynlong ia ka jingialang hapoh ka jingpyniaid u Pastor Rev. Augustine Sungoh. Ha kane ka jingialang la ioh ia ka jingkren maitphang na u Dr. Henry Lamin uba dei u kpa jong u Albinus H.L. Laskor, haba kren u Dr. Lamin u ong ba ia kane ka jingialehkai futsal ha ka pyrthei la sdang na ri Spain, kumta ruh ia kane ka jingialehkai fusal Football Factory ha Nangbah la sdang na ka jaka kaba khot “Spaiñ”, kaba hap hapoh u pud u sam jong ka shnong Nangbah.
Kiwei de ki Rangbah kiba la ai jingkren kyrkhu kyrdoh ia u trai jong kane ka madan ki kynthup ia u ma Pet Dhar, bah Jonrel Mawroh, ma O.P. Pasi, ma Grecentus Susngi MDC bad ia ka jingduwai la ai da u O.S. Thubru u wei na ki Tymmen basan jong ka Balang Presbyterian Nangbah.
U Pastor S.S. Nongrum uba long u kongsan, ha ba kren ha kane ka sngi u pynpaw ia ka jingkmen bad ai ka jingkhublei kyrkhu kyrdoh ia u samla Albinus H.L. Laskor uba long u trai jong kane ka Futsal, u long u wei na ki samla ba im sngi ban kyntiew ia ki kam sports hapoh ka shnong Nangbah.
Haba phai sha ki paidbah bad ki samla ieid futsal u Pastor u ong ai ba kane ka jaka kan long kaba khuid kaba suba ym da ki bilor, ki plastic bad u kyntu ia baroh ban kiar na kino kino ki jingbym khuid kiba pynsngewsih ia U Blei Nongbuh Nongthaw bad haba wan ialehkai bad wan peitkai to shim ba kane ka jaka ka long ka jaka kaba khuid bad kaba kyntang kaba pynsngewbha ia U Blei bad kyrkhu kyrdoh ia kane ka Futsal Play Ground ba kan nangiaid shaphrang ha ki por bad ki sngi ki ban dang wan bad ki nongialehkai bad ki nongwan peitkai ki briew kiba tipbriew tipblei.
Khadduh la ioh ia ka jingkren sngewnguh da u samla Alibinus H.L. Laskor uba long u trai jong kane ka futsal plag ground.
