Ha ka sngi nyngkong u Myntri Rangbah ka jylla u Conrad K Sangma ula plie ia ka jaka pule Engineer ne ka Engineering College kaba nyngkong tam hapoh ka jylla Meghalaya ha ka jingiadonlang u Myntri ka tnad Pule puthi u ma Lahkmen Rymbui.
Ia kane ka college la shna lyngba ka project jong ka Rashtriya Uchchatar Shiksha Ahiyan (RUSA) bad la tei ia ka ha ka dor T.26 klur tyngka. Kane ka college ka don ia ka campus kaba heh haduh 7.8 akar bad ka don hapoh ka jaka jong ka Shillong Polutechnic kaba ha Mawlai Kynton Massar, East Khasi Hills District.
U Myntri Rangbah haba kren ha kane ka sngi ula ong ba ka sorkar hapoh kine ki san snem kala khmih bha ia ka jingmyntoi jong ki samla bad dei lyngba kane ka sorkar kala shimkhia ban pynurlong ia kane ka jaka pule Engineer. U la ong ba ka sorkar kala iohlad ban ia pylliew jingmut bad ki 90 hajar ngut ki samla bad kala thaw ia ki lad ki lynti ha kiba bun ki liang ban pynmyntoi ia ki, naduh ka jingsengkam lajong, ki kam sport bad ki kam rwai ne ka put ka tem.
Ula ban jur ba ki samla ki dei ki nongkynti jong ka jylla, kumta la da nang ban pyndonkam ia ka bor jong ki ha ka lynti kaba dei yn sa lah ban pynthikna ba ka jylla Meghalaya kan long kawei na ki jylla kaba kiew bha hapoh ka ri India.
Kane ka Engineering College kan don shwa ia ki 3 (lai) tylli ki lain pule kata ka Civil Engineering, Electrical Engineering bad ka Mining Engineering kaba lah ban pdiang mar 30 ngut ki samla pule ha kawei kawei ka lain.
Ha ka jingiadei bad ki nongtrei bad nonghikai jong kane ka College, ka sorkar kala pynmih 55 tylli ki post kaba kynthup ia ki 36 tylli ki kam hikai bad 19 tylli ki kam ban trei hapoh ophis.
