Ka Dr. Norman Hospital, Jowai, Khasi Jaiñtia Presbyterian Assembly (KJPA), mynta ka sngi 20.01.2023, ka la ïoh ban plie bad buh ïa ki maw nongrim haduh hynriew tylli ki Project bapher bapher kiba la dep ban shna na ka bynta ki jingdonkam jong kane ka jaka ai jingsumar jong ka KJP Assembly, kaba la juh tip ruh kum ka Mission Hospital kaba don ha sor Jowai.
Haba sdang jong ka jingïalang na ka liang ka Medical Superintendent ka Hospital ka Dr. D. Nongpluh, kala ïathuh ïa ka jingiaid lynti jong kane ka Hospital kaba la kumba 70 tylli ki snem hapdeng ki jingeh kiba bun, kala ïathuh ba kane ka Hospital ka la ngat ha jingpluhding kaba shyrkhei bha kaba la jia ha ka 2 tarik Ïaiong, 2001, ha kaba ka ding ka la ïoh ban bam shngiam shibun ki karma thiah nongpang bad kiwei de ki jingdonkam jong ka Hospital, hynrei ka la ong, wat la katta ruh U Blei um shym la ieh noh ïa kane ka Hospital haba la ïoh shibun ki jingïarap na ki Balang bapher bapher na ki riew shimet kumjuh na Ri Wales lyngba u (L) Rev D. Leslie lyngba ka PCW bad kumjuh na ki riew paidbah ka Ri Wales.
U kongsan ha kane ka sngi plie ïa kine ki jingtei jong kane ka Hospital udei u Rev. B. B. Lamin, u Moderator PCI General Assembly, haba ai jingkren u la pynpaw ka jingsngew kmen kaba khraw ban don ha kane ka sngi ha kane ka jaka ai jingsumar ha kaba ïa u ruh la kha ha kane hi ka Hospital. U la ong ruh ba na ka liang ka PCI ka ai khublei kyrpang bad kitbok kit rwiang ïa ka Management jong kane ka Hospital kiba la trei shitom haduh bala lah ban wanrah ïa kane ka sngi kaba kmen bad ïoh ïa kine ki jingdonkam jong kane ka Hospital na ka bynta ban ai ka jingshakri kaba khambha shuh shuh ïa ki nongshah sumar.
Ki Hynriew tylli ki Project kiba la plie mynta ka sngi ki kynthup ïa ka Ramp Access Way, kaba la ot ïa u ribbon bad plie ïa u mawsah jingkynmaw da u Rev. B.B. Lamin Moderator PCI General Assembly, ka Maternity Block da u Rev. D. Rymbai Moderator KJP Assembly, ka Elavator ne ka Lift da ka kong I. Suchiang Chairperson Jingïaseng Kynthei KJP Synod Mihngi, ka Physiotherapy Block da u Rev. K. Pariat Senior Executive Secretary KJP Synod Mihngi, ka Administrative Building da u Rev. N. S. Phawa Chairman Managing Committee bad ïa ka Retaining Wall da u Rev. C. S. Suchiang, Secretary KJP Assembly. Ïa ka jingïalang la pyllong ha phyllaw ka Hospital kaba la pynïaid da u Rev. N. S. Phawa.
Ha kane ka sngi la ïadonlang ruh ki dkhot jong ka KJP Synod Mihngi bad Sepngi, ki Doctor, ki Nurse, ki nongtrei ka Hospital, kong E. L. Warjri ADM WJHD, u Pa Dolloi Elaka Jowai ma Poramon Kynjing, President Seinraij Jowai ma O.R. Challam, ki Pastor ki Tymmen Basan bad kiwei de. La pynphuh pynphieng ïa kane ka sngi da ki jingrwai na ki samla GNM, School of Nursing jong kane ka Hospital.
