Ka Bouncers Association of Meghalaya (BAM) Jaiñtia Hills District, mynta ka sngi 8 tarik u Naitung, 2025 kala ïoh ban plie thymmai ïa ka ophis treikam jong ka ha Ladthadlaboh, Jowai.
Ïa kane ka ophis la wan ban khap ribbon da u kongsan ma Iahmioo Khyriem uba dei ruh u Adviser jong kane ka seng, haka jingdonlang u President ma Yoosar Kynjing nalor kiwei de ki dkhot jong ka BAM-JH.
Ka BAM-JH ka dei kawei na ki kynhun kaba trei na ka bynta ka bha ka miat bad ban pynïohkam ïa ki khun samla shynrang bad kynthei, khnang ba kin lait na ki jingsniew kiba ha rukom haka imlang ka sahlang, ïa kaba la seng haka 14 tarik Nailur, 2020 ha nongbah Jowai.
U ma Iahmioo Khyriem haba ai jingkren ula ai ka jingïaroh ïa ki kam ba bha jong ka BAM-JH kiba kala dep ban synñiang ha ka imlang ka sahlang, da kaba u kyntu ba kin nang ïaitrei shitom ha ka lynti kaba khuid ba suba.
Ula ong ‘katno ka long ka jingsngew sarong ïa kane ka kynhun Bouncers Association of Meghalaya hapoh ka Ri-Lum Jaiñtia kaba la sdang na i ka ba rit eh bad mynta kala sdang ban kiew katba dang mih ki sngi’. Shuh shuh ula kyntu ïa ki para dkhot baroh ba kin long kiba ïatreilang ha kino kino ki kam ba bha jong ka Association.
Kiwei de kiba ai jingkren ki kynthup ïa u ma Vincent Lyngdoh uba dei u General Secretary ka West Jaiñtia Wrestling Association.
Ïa ka jingïalang ha kane ka sngi la pynïaid da u President ma Yoosar Kynjing, la ïoh ruh ka jingduwai na u Jesmine Dkhar bad ka jingkren ai khublei na u Newsonroy Pyrbot General Secretary ka seng.
