Mynta ka sngi u Myntri Rangbah ka Jylla u Conrad K Sangma u la wan ban plie paidbah ia ka Civil Hospital ha Khliehriat lane kata ka Hospital ba 100 jingthiah ha ka jingialang kaba la pyniaid da u Director of Health Services (MI) u Dr Aman War.
Haba kren ha ka jingialang u Conrad u la ong ba ka Sorkar ka don jingmut ban pynkhlaiñ shuh shuh ia ki jaka ai jingsumar hapoh ka jylla bad ka Sorkar ka buh ha khmat eh ban kyntiew ia ka pule puthi bad ia ka Social Welfare ha ka jylla. U ong ba ha ki snem kiba la leit la iohi ka la don ka jingkiew ha ki jaka ai jingsumar ha kaba ka sorkar MDA ruh ka la ai ka jingkyrshan kaba pura ha kaba iadei bad ka phang ban kyntiew ia ki jaka ai jingsumar na ka bynta ka koit ka khiah jong ki paidbah.
U la ong ruh ba ka skim jong ka sorkar jylla kaba T. 30 klur tyngka ka dei halor ka jingthmu ban kyntiew ia ki jaka ai jingsumar kum ki Sub Centre, ki PHC, ki CHC bad yn sa nang kyntiew shuh shuh lada ioh ia ka skim na ka World Bank.
Kiwei de kiba la ai jingkren ha kane ka sngi ki kynthup ia u ma Kyrmen Shylla MLA ka thaiñ uba dei ruh u Myntri ka sorkar Jylla ba dei peit ia ka tnad Social Welfare, u Deputy Commissioner ka East Jaintia Hills u Abhilash Baranwal, IAS, ka Commissioenr and Secretary ka Meghalaya Health and Family Welfare ka M.N. Nampur, IAS bad kiwei.
Ha kane ka prokram la ioh ïa ka jingrwai pdiang buron na ki Staff Nurse jong ka Khliehriat Civil Hospital.