U ma Wailadmiki Shylla, MLA ka Jowai Constituency uba dei ruh Chairman ka MUDA Shillong ha kane ka 14 tarik u Kyllalyngkot, 2025 ula plie paidbah ïaka Public Toilet bala bei pisa daka Rotary Club Jowai kaba don ha madan Kiang Nangbah Stadium, Jowai.
Ha kane ka sngi la wan ban ïadonlang naduh u ma C. Syrti, Superintendent of Police, West Jaiñtia Hills, u Khroobok Passah, DSO, West Jaiñtia Hills, u Rtn. G. Pradeep Pillai, Asst. Governor Zone 13, u Rtn. Barnabas Nangbah, ki Official ka West Jaiñtia District Sports Association naduh u ma EMH Passah, Working President, u Lammat-oo Laloo, General Secretary, u Patrick Lamare, Vice-President, ma Nangebormi Sutiang, Football Secretary WJDSA bad ki dkhot ka Rotary Club Jowai.
Na ka liang u Rtn. Mewothi Gatphoh ula long kum u Master of Ceremony, la don ruh ka jingrwai ïaka sur Jana Gana Mana (National Anthem) haka jingïalam u Rtn. D.F.Majaw, katba u Rt. Samehi Laloo haba pynkut ula ai ki kyntien sngewnguh.
U Rtn. Rudolf E. Laloo, President Rotary Club Jowai kum u shongknor ula pynsngew ïa ki kam babha kiba ka Rotary Club Jowai kala dep ban trei ha kine ki 30 tylli ki snem na ka bynta ka bha ka miat jong ka imlang sahlang ka Ri Jaiñtia, kumjuh ula pynsngew shaphang kane ka projek kaba la treilang ryngkat ka Rotary Club Jowai, ka West Jaiñtia District Sports Association bad u MLA ka Jowai Constituency lyngba ka skim jong ka Jowai Municipal Board, hapoh ka 15th Finance Commission Award 2020-21 (TIED–GRANT).
Kum ban shu pynkymmaw ïa kane ka projek la buh mawnongrim ban tei ha ka 22 tarik Lber, 2022 bad mynta ka sngi 14 tarik Kyllalyngkot, 2025 la ïoh ban plie paidbah ïa ka hashwa ban pynlong ïaka 6th Meghalaya Games ha sor Jowai.
Na ka liang u Rtn. S.K. Lato, Vice-President ula pynsngew shaphang ka mat kaba ong ‘Service About Self’ kaba long ruh ka kyntien ai mynsiem ïa ki dkhot ka Rotary bad ïa kiwei de ki paralok.
U Rtn. G. Pradeep Pillai, Asst. Governor Zone 13 ula pynpaw ka jingïaroh ïaka Rotary Club Jowai kaba la lah ban leh shibun ki kam babha haka imlang ka sahlang, ula batai ruh shaphang ka jingmut jong ka kyntien ai mynsiem ka Rotary International ha une u snem kaba ong ‘Magic of Rotary’.
Katba u ma EMH Passah, Working President WJDSA ula pynpaw ka jingsngewnguh ïa ka Rotary Club Jowai bad ïa u ma Wailadmiki Shylla, MLA kiba la trei ïa ki kam babha ban pynsuk ïa ki paidbah kiba wan peitkai ïa ki jingïalehkai bapher bapher ha madan Kiang Nangbah Stadium.
U MLA ma Wailadmiki Shylla haba kren kum u kongsan hashwa ban ot ïa ribon ula ong haba tei ïa kano kano ki jingshna kam don satia ka jingeh, hynrei kaba eh bad kaba shitom ka long hadien bala dep shna ym don pat kiba sumar ban pynbha lane buddien ïa kiba la dep shna, kumta ula kyntu ïa ka Rotary Club Jowai kumjuh ïa ka West Jaiñtia District Sports Association ba kan shimkhia ban leh ïa kaba donkam na ka bynta ka jingbha jingmiat jong katei ka Public Toilet ha ki sngi ban wan.
Kum ka dak jong ka jingsngewnguh ïa ki para dkhot ka Rotary Club Jowai kiba la ïarap ban ïa noh synñiang naka bynta ban shna ïa katei ka Public Toilet la aiti ha ki ïa ki syrnot (Certificate of Appreciation) bad la pynshong shit shuh shuh ïa kane ka prokram da ki jingrwai na u Lorenzo bad u Rikdup Laloo.
