Ki nongshong Shnong ka Namdong B ki la sakhi ia ka jingkiew ha ka liang ka roi ka par hadien ba ka Jaintia Hills Development Society (JHDS) ryngkat bad ka jingiatreilang bad ka National Bank for Agriculture & Rural Development (NABARD) ki la lah ban tei ia ka Iew (Rural Haat) hapoh ka Shnong Namdong B.
Ia ka jinglut jingsep ban tei ia katei ka Iew la bei tyngka da ka NABARD bad la pyntrei bad pynbit pynbiang da ka Jaintia Hills Development Society kaba long kawei na ki Seng Treimon sngewbha bala paw bha hapoh ka District.
Ia kane ka iew la plie paidbah da ka Kong. J.R. Blah OIC/General Manager NABARD RO, Shillong ha ka 23 tarik u Naitung 2024.La pynphuh pynphieng shuh shuh ia kane ka sngi da ka jingiadonglang ki riew pawkhmat kynthup u Ma. Dawan Lyngdoh, MDC, Mynsngat-Khanduli Constituency, U Dr. H. Niang, Block Development Officer Namdong C&RD Block, ka Kong. S.N. Lamare, AGM NABARD Jaintia Hills, U Fr. Manbha Pakem, Director of JHDS, u Ma. D.S War, Waheh Shnong Namdong B, U Ma. Lambor Lyngdoh, Acting Waheh Raij Namdong bad u Ma Denis Kurkalang Coordinator JHDS.Haba ai jingkren ha Katei ka sngi, ka Kong J.R. Blah ka pyni ia shibun ki jingmyntoi ba kane ka Iew ka lah ban ai sha ki nongshongshnong.
Ka la pynpaw ruh ia ka jingsngewnguh ia baroh kiba la iadonbynta ban shna bad pynbit pynbiang ia katei ka Iew. Shuh shuh ka la ban khia ruh ia ki nongshong iew ba kidei ban sngewtrai bad lehkhuid ia katei ka jaka khnang ban wanrah ia ka koit ka khiah kaba bha ba miat.
Da ka mynsiem ba sngewnguh, u Fr. Manbha Pakem u la aikhublei bad iaroh ia ka NABARD kaba la iarap pisa ban shna ia katei ka Iew. U la kubur ruh ba kane ka Iew kan wanrah ia ka lad kamai jakpoh ia ki Longkmie bad ki nongrep jong katei ka thaiñ hi baroh kawei.
Ka Kong S.N. Lamare, AGM NABARD haba ai jingkren ka la pynshlur ia ki Kynthei kiba don ha ka Self-help Group bad ki Nongrep ba kin pyndonkam hok ia katei ka Iew kaba ki la ioh khnang ban kyntiew ia ka ioh ka kot hala ïing la sem. Shuh shuh la ai ka jingiaroh khamtam ia ka Jaintia Hills Development Society kaba la treishitom ban pynbit pynbiang ha ka jingtei ia ka tei ka ïing.
Haba bynrap shuh shuh, U Dr. H. Niang u la kyntu ia ki bor ba dei peit ban kin wanrah shuh shuh ia ki kam pynroi sha katei ka thaiñ ba dang sahdien ha kiba bun ki liang.
