U myntri ka tnad ka koit ka khiah u ma Wailadmiki Shylla mynta ka sngi Saitjaiñ 7 tarik u Lber, 2026 ula wan ban plie paidbah ïaka ‘Borbon Hotel & Restaurant’ kaba don ha Loomsooïung, Newhills Jowai West Jaiñtia Hills District.
Ha kane ka sngi la ïoh ruh ka jingkren pdiang na ka R. Kdup Passah, ka jingnguh Blai na u ma Valentino Paswet, ka jingkren naka ïing da u ma Kitbok Passah bad na u ma S Kmen Lato, haka jingdonlang ki riew rangbah kiba la shah khot sngewbha.
U kongsan ma Wailadmiki Shylla haba ai jingkren ula pynpaw ka jingsngewkmen ‘haba ïohi ba ki khun ka Constituency jong u kila kiew bha haka liang kamai kajih da kaba plie paidbah ïa kum kine ki Hotel bad ki Restaurant kiba heh hapoh ka District’
Kumta ula kyntu ïa ki trai bad ki nongtrei ba kin ai ka jingshakri kaba bha tam ha ki liang baroh ïa ki briew kiba wam donkam ha kane ka Hotel & Restaurant, haka juh ka por ula kitbok kitrwiang ïa kane ‘Borbon Hotel & Restaurant’ ba kan dang ïaid shakhmat haka jingshakri bad ban kynkiew ïa ka nam jong ka sor Jowai kumjuh ïa ka District bad ïa ka jylla hi baroh kawei.
Ula kren ruh halor ka jingdawa jong ki jaka sah kum ki Hotel, Guest House bad kiwei de hapoh ka District haba don kino kino ki prokram ba heh bala pynlong da ka sorkar khmtam haka jingwan jong ka Nation Games ha u snem 2027.
Haka juh ka por ula pynsngew ka sorkar mynta kala shem shitom ban pynrung kam ïa ki samla, namar ki kam hapoh ka MPSC, DSC bad ki Contractual kila don tang kumba hapoh 2 hajar tylli haka shisnem hynrei kiba kyrduh kam ki don da ki phew phwe hajar ngut.
Ula ong ruh ba lyngba ka jingdon kum kine ki Hotel bad ki Restaurant kala long kum ka lad jingmyntoi ban pynïoh kam pynïoh jam ïa ki nongshong shnong ka Jylla. Ula kyntu ruh ban shim kabu ïaki skim sorkar bapher bapher kiba long ruh ka lad ban seng kam seng jam.
La pynsngew da ki trai jong ka Borbon Hotel & Restaurant ha kane ka juh ka jaka haki por mynshaw haka snem 1971 la shna da ka Borbon Cinema Hall bad kane ka Cinema kala paw bha ha sor Jowai bad ïa katei ka kyrteng ‘Borbon’ la shim da ki ar ngut ki longkmie kiba la khlad noh kata ka Longbor Passah bad ka Tibon Passsh.
