Kum shi bynta ban pynsuk ia ki nongshong shnong jong ka East Jaiñtia Hills District mynta ka sngi la pyllait paidbah ia kawei ka App kaba treikam lyngba ka Whatsapp Chatbot kaba la ai kyrteng “EJHD Assistant Bot”.
Ia kane ka App la pyllait paidbah da u A.K. Singh, IAS, SDO (Sadar), East Jaiñtia Hills, District, Khliehriat halor ka jingialam jong Deputy Commissioner, East Jaiñtia Hills District. Ia ka prokram la pynlong ha Conference Room ha ophis DC Khliehriat.
U Singh ula ong ba ka jingthmu jong kane ka App ka long ban pynsuk ia ki nongshong shnong ka District ban ioh jingtip shaphang ki jingtreikam bapher bapher jong ka sorkar, lyngba kane ka Assistant Bot lah ruh ban aplai ia ki Scholarship, ki Grant bad kiwei kiwei kiba lah ban ioh na ki tnat sorkar bapher kum na ka ophis u DC, ophis Block, na Social Welfare bad na ophis Labour bad kiwei kiwei de.
Lah ruh ban aplai ia ki ST Certificate, E-Shram Registration, Aadhaar, ki EPIC bad baroh ki jait skhim jong ka sorkar lah ban aplai lyngba kane ka App.
Ban pyndonkam ia kane ka Assistant Bot ki briew ki lah ban thoh da ka message da kaba ong ‘Hi’ bad phah sha ka No. 9233515972 bad hadien ba sdang ka jingiakren ki nongpyndonkam ki lah ban jied ia kaei kaba ki kwah ban ioh jingtip.
