Ka Chad Sukra jong ka Seiñ Raij Nangbah kala kut mynta ka sngi (10.04.2022) hapdeng ka jingphuh jingphieng ha madan Duwan knia Blai Iawmusiang, Nangbah.
Ha kane ka Chad Sukra la wan ban iashim bynta da ki khun jong ki Dong ki shnat kiba don hapoh ka Seiñ Raij Nangbah ha ryngkat ki riam ki beit bad ka shad ka rwai. U kongsan ha kane ka sngi u dei u MDC ka Shangpung u ma J. Treilang Suchiang, la iadon ryngkat u ma Lakhon Biam, MDC ka Nangbah Constituency. Ia ka prokram Chad Sukra la pyniaid da u ma R.M. Garod Daloi Elaka Nangbah uba dei ruh u President ka Seiñ Raij Nangbah ha ryngkat u ma Kordor Lamare General Secretary ka Seiñ Raij Nangbah.
Ha kane ka sngi la ioh ka jingnguh Blei da u Deibormi Thubru u Pator ka Raij Mukhla. Kiba la ai jingkren ha kane ka sngi ki kynthup ia u ma Chemhok Garod, ma Wom Chyrmang President Sein Kyntu Sein Raij 12 Daloi, ma Kamai Susngi, Tonroi longwai Waheh Chnong ka Chnong Nangbah, ma Standbyme Sari General Secretary ka Dorbar Shnong Mukhla Nongrim, Lakhon Biam MDC ka Nangbah kumjuh na u kongsan ma J. Treilang Suchiang MDC Shangpung. Baroh ki nongkren kila pynpaw ba ka long kaba donkam ban pynneh pynsah ia ka riti dustur (Culture), kum ki sur tynrai, ki shad tynrai bad ka put ka tem tynrai. U ma Treilang u iaroh ruh ia ki nongialam jong ka Seiñ Raij Nangbah kiba la lah ban pyniaid beit pyniaid ryntih ia kane ka Chad Sukra. Ia ki kyntien aikhublei la ei da u ma Kordor Lamare General Secretary Seiñ Raij Nangbah. Ia kane ka sngi la pynshit pynsyaid da ki jingshad na 7 tylli ki dong ryngkat bad ki seng Longkmie ka Raij Nangbah, la wan iashim bynta ruh da ki khun ka Sein Raij Mukhla na ka chnong Mukhla Nongrim, kumjuh na ki samla ka Seiñ Raij Muthlong.
