Hashwa ban poi ka Shad Ñiam Behdeiñkhlam jong ka Raij Jowai, ki nongïalam ñiam ka Raij kila sdang ban bun kam, ha kaba pyndep ïaki ñiam ki rukom ha ki bynta bapher bapher naduh ka kñia ai nguh ai dem kaba shisien shisnem.
Ïa kane ka lehñiam ba nyngkong la leh mynta ka sngi 15 tarik u Lber da kaba pyndep ïa ka Kbai Mooknor ha Iawmusiang kaba ki khot ka Iaw ka Syiem.
Ha kane ka Lehñiam Kbai Mooknor lam khmat da u Dolloi ka Elaka Jowai u ma Purmon Kynjing kum u khlieh ka ñiam bad u khlieh ka Elaka ha ryngkat u Pator, u Langdoh, ki Sangot, ki Wasan, ki Phrakur Phrakmai bad ki Waheh Wasian ka Raij kila mih shakhmat ha Iaw ka Syiem ban ai jingtip hapdeng kiba wan ïew wan hat bad ki nongshong die ba la sdang ka lehñiam ne ka Kñia ai nguh ai dem da ki hukum Blai.
Ha kine ki sngi ban wan ha shwa ka Behdeiñkhlam yn pyndep shuh shuh ïa ki jinglehñiam bapher bapher naduh ka Thoh Langdoh, ka Shad Shukra ka Soodwar Sooluti bad ïa ka Tawiar Takan ha u bnai Jylliew kiba long ki ‘Blai Chnong Blai Raij’ ïa kiba la pynshong pynthiah naduh basdang Ka Raij Ka Chnong ha ryngkat ki hukum jong ki adong ñiam.
