Hashwa ban poi ka Shad Ñiam Behdieñkhlam hapoh ka Raij Jowai, ki nongïalam ñiam ka Raij kila sdang ban bun kam, ha kaba pyndep ïaki ñiam ki rukom ha ki bynta bapher bapher bad ha kane ka taïew kila pyndep ïaka kñia ai nguh ai dem kaba shisien shisnem ïa ka ‘Blai Chnong Blai Raij’.
Ïa kane ka lehñiam la sdang naduh ka sngi Mulong 30 tarik u Jymmang daka Dih Soopen ha Yung Langdoh, nangta haka sngi Musiang ka 31 tarik la pyndep ïaka Kbai Mooknor bad mynta ka sngi 1 tarik u Jylliew sngi Muchai la pyndep ïa ka bhah ka bynta ban ker ban da ïa ki sawdong sawkun ne kiba la khot ki ‘Soodwar Sooluti’ ryngkat ka ‘Tawiar Takan’.
Kine ki Soo Dwar Soo Luti ki kynthup ya u Mookhai, Mootong, Mooralong bad u Moosniang katwa ka Tawiar Takan ka long ïaka ‘Wah Myntdu’.
Katba haka Lehñiam Kbai Mooknor la ïalam khmat da u Dolloi kum u khlieh ka ñiam bad u khlieh ka Elaka ha ryngkat u Pator, u Langdoh, ki Sangot, ki Wasan, ki Phrakur Phrakmai bad ki Waheh Wasian ka Raij kila mih shakhmat ha Iaw ka Syiem ban ai jingtip hapdeng kiba wan ïew wan hat bad ki nongshong die bala pyndep ïa ka Lehñiam Kñia Khang ne ka Kñia ai nguh ai dem, kumjuh ïaki Soodwar Sooluti bad ïa ka Tawiar Takan kiba long ki ‘Blai Chnong Blai Raij’ ïa kiba la pynshong pynthiah naduh basdang Ka Raij Ka Chnong ha ryngkat ki hukum jong ki adong ñiam.