Ka South West Khasi Hills District Level Inter School Subroto Mukherjee Football Cup Tournament ka la poi sha kaba kut mynta ka sngi ha madan jong ka MDSA, Mawkyrwat ha kaba u bah Renikton Lyngdoh Tongkhar, u Myntri ka tnat P.H.E u la long u kongsan. Ia kane ka prokram la pynlong da ka ophis jong u District Sports Officer, South West Khasi Hills District, Mawkyrwat.
Haba kren ha kane ka jingialang u bah Tongkhar u la iaroh ia ka Sports Department kaba la pynlong kum ia kine ki jingialehkai ka ba long ka jingmyntoi na ka bynta ban kyntiew ia ki sap ki phong jong ki khynnah kiba don ha kane ka thaiñ. Ha kajuh ka por u la pynpaw ia ka jingkmen ban iohi ba ka jingtrei na ka bynta ban pyndep ia ki gallery kiba don ha kane ka Stadium ka la nang iaid shakhmat.
Haba phai pat sha kane ka jingialehkai u la sngewkmen ban iohi ba ki khynnah ki la nang kiew ha ka rukom ialehkai bad ka standard jong ki ka la jan ia ryngkat bad kito kiba ha Shillong da kaba khmih lynti ba kin mih ki nongialehlai kiba tbit na kane ka thaiñ ki ban mihkhmat ha ka jylla bad ka ri baroh kawei. Haba pynkynmaw ba ha kano kano ka jingialeh kin don beit kiba jop bad kiba rem da kaba ai mynsiem ia ki ban nang iaid shakhmat bad ha kajuh ka por u la kyntu ban kiar na ki jingmlien kiba sniew ki ban ktah ia ka koit ka khiah bad ka jingim jongki bad u kit bok kit rwiang ba kin nang kiew shaphang ha baroh ki liang.
Ka jingiakhun ha kane ka sngi ha ka Under-17 Girls ka la long hapdeng ka Rangthong Christian HR Secondary School pyrshah ia ka Lyngdoh Wanniang Secondary School ha kaba ka Lyngdoh Wanniang Secondary School ka la jop da 2 – 1 kol.
Ha ka jingiakhun Under-14 ka Jakrem Presbyterian Higher Secondary School ka la jop pyrshah ia ka Mawlieh Secondary School ha ka Tie Breaker da 4 – 3 kol bad ha ka Under-17 Boys ka Balang Mawlangwir Higher Secondary School ka la jop pyrshah ia ka Mawjarain Presbyterian Secondary School da 2 – 0 kol.
