Ka Dorbar Shnong Khimusniang, Jowai mynta ka sngi Saitjaiñ 28 tarik u Nohprah, 2024 kala pynhap pyrda noh ïa ka jinglehkmen Platinum Jubilee ne ka jingdap 75 snem jong ka shnong hapdeng ka jingiphuh iphieng, kaba la wan ban sakhi lang da u MP ka Rajya Sabha u Dr. W.R. Kharlukhi.
Ha kane ka sngi pynkut la ia don ryngkat u MLA ka thaiñ ma Wailadmiki Shylla uba dei ruh u Chairman ka Meghalaya Urban Development Authority (MUDA) uba la long kum u Symbud Kongsan, u MDC ka thaiñ ma S. Pasweth, u Doloi ka Elaka Jowai u ma Puramon Kynjing, ki Waheh Shnong na ki shnong bapher bapher kiba don hapoh ka nongbah Jowai, ryngkat kiwei de kiba shah khot sngewbha.
Da ki sphah spah ngut ki nongshong shnong ryngkat bad ki nongïalam shnong kila wan ban ïadon bynta lang ha kane ka sngi kiba kynthup naduh u Waheh Shnong ma A. Lamare, Secretary shnong ma W.M. Bamon, ryngkat ki Dkhot jong ki Committee bapher bapher kiba la pynlong ïa kane ka jingrakhe jubili kaba jop.
Haba pynkut ïa kane ka jinglehkmen Platinum Jubilee la pynlong ïa ka jingialang paidbah ba la pynlong ha Indoor Hall jong ka shnong. Shwa ban sdang ïa ka jingïalang kala don ka jingpule Baibl bad ka jingduwai na u Pastor A. Passah. Ka jingpynsngew ïa ka report na u Sectary ka Platinum Jubilee Committee ma E. Suting, ka jingkren lyngkot na u Chairman ka Souvenir Committee, ka jingrwai na ki Kids Choir, jingshad na ka Seng khynroo Khylood, ka jingpyllait ïa ka kot sahnam ‘Souvenir’ da u kongsan jong kane ka sngi.
La ïoh ïa ka jingkren na u Kongsan u Dr. W.R. Kharlukhi uba la pynsngew ïa ki jingkylla kiba don ha ka shnong naduh ki por mynshwa haduh mynta. U la ong ba ka shnong kala nangkiew ha baroh ki liang, naduh ka jingnang jingstad, ka roi ka par, ka shongsuk shong shngaiñ bad ka jingïatylli jong ki nongshong shnong.
Ula pynkynmaw ïa ki por ka jinglong khynnah jong u ba u ju poi sha ki bynta jong ka kane ka shnong, ula pynkynmaw ruh ia ka jingdon bynta lang jong u kum u nongïalam seng bhalang ban ïakhih ïa ki jingmyntoi jong ka Rilum Jaiñtia khamtam ïa ka Shnong Jowai. Ha ka juh ka por ula kular ban ai jingïarap ïa ka Dorbar Shnong Khimusniang lyngba ka skim MP jong u snem 2025-26 kaba kot haduh 10 lak tyngka na ka bynta ban pynbha ia ka Community Hall jong ka shnong.
Kiwei de kiba la ai jingkren ki kynthup ia u ma Wailadmiki Shylla, uba la kular ban pynïoh ïa ki jingdonkam jong ka shnong kum ki lynti syngkieng bad kiwei de ki jingdonkam. Kumjuh ruh la ïoh jingkren na u Waheh Shnong ma A. Lamare uba la pdiang sngewbha ruh ïa baroh kiba wan sha kane ka jingrakhe Jubili ka shnong.
Ïa ka jingïalang la pynïaid da ki ar ngut ki khun jong ka shnong kiba kynthup ïa u ma L. Lyngdoh bad kong R. Patlong. ïa ki kyntien ai khublei la ai da u ma J.M. Pohsngap uba dei u Chairman ka Platinum Jubilee Committee.
Kum ka dak jong ka jingpynkut kala don ruh ka jingpynhiar ïa ka lama Jubilee da u ma Wailadmiki Shylla, ka jingpynher ïa ki Dingkum bad ka jingduwai pynwai da u Pastor M.H. Blah. Katba ha ka por janmiet kala don ka jingpynbyrnia lyngba ki rwai, ki shad bad ka jingïakop Mrs da ki khun ka shnong.
Kum ban shu pynkynmaw ïa ka Shnong Khimusniang la seng naduh ka snem 1949 lyngba ki 16 ngut ki riew rangbah ha kaba ka shnong kala pynsahnam ruh ïa ka kyrteng jong ki ha u maw Sahnam ba la buh ha Indoor Hall ka shnong. Ïa kane ka jingrakhe Jubillee la sdang naduh ka 6 tarik u Kyllalyngkot, 2024 ha ryngkat ki prokram bapher bapher baroh shisnem lynter kiba kynthup ïa ka Stress Management for Student, ka jingthung dieng, ka rukom ai jinghikai ban sengkam, ka jingsynñiang snam, ki jingïalehkai sports, ki jingïakop dro dur, ki rwai ki shad bad kiwei kiwei de.
